“Бу быһылааҥҥа биир да киһини хаалларыахпыт суоҕа. Суһаллык туох баар миэрэни барытын ылыныахпыт”, — диэн бэлиэтээтэ Ил Дархан Егор Борисов Амма улууһугар ыыппыт мунньаҕар. Бүгүн кини Амма улууһугар тиийэн мунньах ыытта, ууга барбыт нэһилиэнньэлээх пууннар олохтоохторун кытары көрүстэ.
Егор Борисов мунньах кэмигэр, бастатан туран, эми-тому, аһы-үөлү, иһэр ууну быспакка хааччыйа турарга эттэ. Ону таһынан уот ситимин, суотабай сибээһи көрө сылдьарга сорудахтаата. Кини сүрүн болҕомтотун нэһилиэнньэҕэ информацияны тириэрдэн иһиигэ, ууга барбыт сирдэртэн дьону түргэнник аҕалыыга, бэрээдэги көрүүгэ уурда. «Аһы-үөлү, эми-тому хааччыйыахпыт. Суол-иис, сибээс оҥоһуллуоҕа. Билигин нэһилиэк баһылыктара сүрүн күүһү туох уларыйыы тахсар да онно суһаллык уонна тэтимнээхтик быһааран иһиигэ ууруоххутун наада», — диэн бэлиэтиир Егор Афанасьевич.
Мунньах кэмигэр сорохтор дьиэлэригэр бырапыыскалара, докумуоннара ситэтэ суоҕа көһүннэ. Олохтоохтор дьиэлэрин-уоттарын оҥостоллоругар туох көмө кэлиэҕин ыйыталастылар.
Информационнай бэлиитикэ департаменын салайааччыта Станислав Платонов иһитиннэрбитинэн, Ил Дархан сорудаҕынан Амма улууһугар ыам ыйынааҕы биэнсийэ икки-үс күнүнэн тириэрдиллиэҕэ. Итини таһынан предпринимателлэри кытары кэпсэтии ыытыллан, аска-үөлгэ сыана үрдүө суоҕа.
Аммаҕа билигин Ил Дархан Егор Борисов салайааччылаах бөлөх тиийэн үлэлии сылдьар. Бөлөххө бастакы вице-премьер Михаил Осипов, миниистирдэр Семен Винокуров, Вера Кузакова, миниистири солбуйааччы Николай Гришаев, ону сэргэ «Якутскэнерго» АУо, ЫБММ бэрэстэбиитэллэрэ бааллар.
Ыспыраапка: Билигин Амма улууһугар үс нэһилиэк ууга баран турар. Барыта 256 тэлгэһэ, 171 олорор дьиэ, ону таһынан, алта социальнай дьиэ ууга барда.
Аграфена КУЗЬМИНА, “Саха сирэ” хаһыат, edersaas.ru