Ааспыт ыйга “АЛРОСА” хампаанньа президенэ Андрей Жарков дуоһунаһыттан уурайарын, кини оннугар билигин “Сбербаан” вице-президенинэн үлэлии олорор Сергей Иванов кэлиэҕин туһунан иһитиннэрии тарҕаммыта. Кини ананыытын хампаанньа Кэтээн көрөр сэбиэтигэр көрүөхтээхтэр.
Аграфена КУЗЬМИНА, «Саха сирэ» хаһыат, https://edersaas.ru/
Бу күннэргэ “АЛРОСА” хампаанньа боппуруостарыгар сыһыаннаах үгүс мунньах буолуохтаах. Ол курдук, аныгыскы нэдиэлэҕэ Кэтээн көрөр сэбиэт Москваҕа мустан, саҥа президент ананыытын көрүөхтээх. Бу ый бүтүүтэ хампаанньа 2027 с. диэри сайдыытын торумун ырытыы буолуоҕа, ону сэргэ, Мирнэйгэ Хаһаайыстыбаннай актыыпка үлэ-хамнас туһунан кэпсэтиэхтэрэ.
Ил Дархан Егор Борисов олунньуга Кэтээн көрөр сэбиэт бэрэссэдээтэлин Антон Силуановы уонна саҥа ананыахтаах Сергей Иванову кытары көрсөн кэпсэппитэ. Онно кини Саха сирэ хампаанньаҕа көдьүүстээх бас билээччи буоларын, хампаанньа үлэтигэр-хамнаһыгар толору дьайар кыахтааҕын ордук чорботон бэлиэтээн эппитэ.
— Сергей Сергеевичтыын балтараа чаастан ордук “АЛРОСА” уонна Саха сирин туһунан кэпсэттибит. “АЛРОСА” аан дойдуга биир биллэр уонна инники күөҥҥэ сылдьар хампаанньабыт. Хампаанньа өрөспүүбүлүкэ олоҕор-дьаһаҕар ылар оруола улахан. Көрсүһүүбүт кэмигэр итиннэ сыһыаннаах уонна хампаанньа инники сайдыытыгар туһуламмыт, технология өттүгэр баар кыһалҕаларга, геологическэй чинчийии боппуруостарыгар, о.д.а. санаабын эттим. Кэпсэтии түмүгүнэн, Сергей Сергеевиһы уопуттаах, Россия, аан дойду экономикатын боппуруостарыгар олус үчүгэйдик быһаарсар, бэйэтэ тус санаалаах, сыаллаах-соруктаах киһи быһыытынан сыаналаатым, — диэн иһитиннэрэр Егор Афанасьевич.
Аграфена КУЗЬМИНА.