Бэҕэһээ Мирнэйгэ “АЛРОСА” хампаанньа актыыбын мунньаҕар Ил Дархан Егор Борисов саҥаны киллэрэртэн, уларыта тутууну ыытартан куттанымыахха наадатын бэлиэтээтэ. Санатан эттэххэ, Егор Афанасьевич хампаанньа Кэтээн көрөр сэбиэтин бэрэссэдээтэлин бастакы солбуйааччы буолар. Бу сэбиэти РФ үбүн миниистирэ Антон Силуанов салайар.
Генеральнай дириэктэр Сергей Иванов былырыын хампаанньаҕа уустук сыл ааспытын бэлиэтээтэ. Билэргит курдук, “Мир” рудникка дьон өлүүлээх улахан саахал тахсыбыта. Ити экономикаҕа эмиэ улаханнык дьайар, бу рудниктан хостонуллар алмаас уопсай кээмэйиттэн 8 % ылаллар этэ. Ол да буоллар хампаанньа 2017 с. 39,6 мөл. карат алмааһы хостоон, былаанын хас эмэ төгүл куоһарбыта. Итини кинилэр атын сиргэ алмааһы хостооһуннарын үрдэппиттэрин суотугар ситиспиттэрэ.
Билигин хампаанньа бары эбийиэктэригэр куттал суох буолуутун хааччыйыыга анал кэмитиэт тэринэн бырагыраама ылынан эрэр. Генеральнай дириэктэр итини этэн туран, сири-уоту чинчийиигэ, эбийиэктэри тутууга, үп-харчы боппуруоһугар, атыыга-тутууга туох саҥа киириэҕин иһитиннэрдэ.
Егор Борисов өрөспүүбүлүкэ уонна хампаанньа боппуруостары сөҥнөһөн быһааралларын түмүгэр үлэ ситиһиилээх буоларын эттэ. Холобур, 2009 с. кириисис кэмигэр “АЛРОСА” бородууксуйатын кыайан батарбакка, уустук балаһыанньаҕа киирбитэ. Онуоха өрөспүүбүлүкэ салалтата оччолорго бырабыыталыстыба бэрэссэдээтэлинэн үлэлии олорбут Владимир Путиҥҥа тахсан, хампаанньаҕа саҥа тыыны киллэриигэ үлэлэспитэ. Ол түмүгэр “АЛРОСА” алмааһы хостооһуҥҥа аан дойдуга инники күөҥҥэ тахсыбыта.
Итини бэлиэтээн туран, Егор Афанасьевич үлэ көдьүүстээхтик барарыгар саҥаны, сонуну, уларыта тутууну киллэрэртэн куттанымыахха наадатын эттэ. “Үүнэргэ-сайдарга саҥаны көрдүөххэ, уларыта тутууттан куттанымыахха”, — диэн бэлиэтиир кини.
Бэлиэтээн эттэххэ, “АЛРОСА” өрөспүүбүлүкэ бүддьүөтүн дохуоттаах чааһыгар сүрүн оруолу ылар. Регион бэйэтэ киллэринэр дохуотун аҥаара бу хампаанньаттан кэлэр.
Аграфена КУЗЬМИНА, “Саха сирэ” хаһыат, edersaas.ru