Өлөөн улууһугар Үөһээ Муунаҕа алмааһы бырамыысыланнай ньыманан хостооһун алтынньы 31 күнүгэр саҕаламмыта. Бастакы үлэ нэдиэлэтигэр түөрт кимберлитовай туруупкаттан бииригэр, «Заполярнайга» рудааттан төгүрүк быһыылаах, араҕастыҥы суһумнаах дьэҥкир тааһы хостоотулар.
edersaas.ru
Алмаас ыйааһына 51,49 карат, 23 х 22 х 15 мм кээмэйдээх, күндү таас быһа холоон сир анныгар 350 мөл. сыл сыппыт.
«Үөһээ Муунаҕа бу соторутааҕыта эрэ аһыллыбыт сиргэ 50-тан тахса карааттаах бастакы алмаас көстүбүтэ үөрүүлээх түгэн баайдаах сир саппааһа кэскиллээҕин, инникилээҕин туоһулуур. Алмаас кыра сурааһыннааҕын да иһин ювелирнай хаачыстыбата үрдүк, ону кырыылаан биэрдэххэ, биир улахан, эбэтэр хас даҕаны бирилийээн тахсыан сөп», — диэн этэр Удачнайдааҕы ГОК дириэктэрэ Александр Махрачев.
Үөһээ Муунатааҕы алмаастаах сир Сахабыт сирин арҕаа өттүгэр, Удачнайтан 170 км сиргэ баар. Чинчийиини ааспыт түөрт кимберлитовай туруупка: «Заполярнай», «Деймос», «Новинка», «Комсомольскай-Магнитнай» туһаҕа тахсыахтаах. Сылга 1,8 мөл караттаах алмааһы 20 тахса сыл устата хостуохтара.
Аан дойдуга алмааһы хостуур бөдөҥ хампаанньа АЛРОСА Үөһээ Муунатааҕы инвестиционнай бырайыакка 16 млрд солк укпута, 2042 сылга диэри алмаас бырамыысыланнаһын үлэлэтэргэ өссө 60 млрд угар санаалаах.
Алмаас баайдаах сир аһыллыыта 2018 с. алтынньы 31 күнүгэр буолбута. Күндү тааһы туһаҕа таһаарар үлэни саҕалыырга дойду бэрэсидьиэнэ Владимир Путин тус хамаандатын биэрбитэ.
Марианна Тыртыкова, «Саха сирэ», edersaas.ru