Айсен Николаев Үөһээ Кураанахха саҥа дьиэ хаһаайыттарыгар күлүүстэри туттарда.
Алдан оройуонугар Үөһээ Кураанахха элбэх кыбартыыралаах саҥа дьиэ тутуллан үлэҕэ киирдэ. Үөрүүлээх бэлиэ тэрээһиҥҥэ СӨ Ил Дархана Айсен Николаев кытынна.
—РФ Бэрэсидьиэнэ Владимир Путин көҕүлээһининэн тэриллибит бырагыраама улахан эрэ куораттарга буолбакка, биһиги өрөспүүбүлүкэбит кыра бөһүөлэктэригэр, сэлиэнньэлэригэр үлэлиириттэн олус үөрэбин, — диэн Ил Дархан үөрүүтүн үллэһиннэ, саҥа дьиэ хаһаайыттарыгар күлүүстэри туттарда.
Саҥа дьиэҕэ кыбартыыралары хаарбах, саахалланар туруктаах дьиэттэн дьону көһөрүү бырагырааматынан ылбыттар. Быйылгы сылга оройуоҥҥа бу номнуо төрдүс дьиэ. Сыл бүтүөр диэри өссө 16 элбэх кыбартыыралаах дьиэ тутуллан үлэҕэ киириэхтээх.
—Быйыл бырагырааманан 570 кыбартыыра, ол эбэтэр 20 олорор дьиэ тутуллан үлэҕэ киирэр, — диэн этэр Алдан оройуонун баһылыга Александр Шестопалов.
Алдан оройуонугар 2025 сылга диэри хаарбах, саахалланар туруктаах 181 233 кв.м., 536 элбэх кыбартыыралаах дьиэттэн 8 589 киһи көһрүөхтээх.
Санатан эттэххэ, 2025 сылга диэри хаарбах, саахалланар туруктаах дьиэттэн өрөспүүбүлүкэҕэ 1 мөл. 156 тыһ.кв.м. көһөрүү былааннанар.
«СтройДорСервер» ХЭУо генеральнай дириэктэрэ Василий Суховерхов Аллараа Кураанах бөһүөлэгин баһылыгар Александр Усенкоҕа дьиэ бэлиэтэ буолар күлүүһү туттарда.
Хаартыскаларга Андрей Сорокин (СИА) түһэриилэрэ
+1
+1
+1
+1
+1
+1
+1