Доруобуйа харыстабылыгар бастакы сүһүөх мэдиссиинискэй санитарнай көмө систиэмэтин сайыннарыы – “Доруобуйа харыстабыла” национальнай бырайыак сүрүн хайысхаларыттан биирдэстэрэ.
Үөһээ Халыма улууһун киин балыыһата бу күннэргэ бастакы сүһүөх мэдиссиинискэй тэрилтэлэри модернизациялааһын бырагырааматынан рентген аныгы мэдиссиинискэй тэрилинэн — маммография аппараатынан хааччылынна.
Балыыһа кылаабынай бырааһа Михаил Иванов кэпсээбитинэн, кинилэр быйыл номнуо түөрт рентген-аппарааты ылбыттар.
Рентген кэбиниэтигэр куттал суох буолуутун ирдэбиллэригэр эппиэттиир өрөмүөнү оҥордулар. Манна маммограбы сэргэ «Ренекс» флюорография аппараата, «Дуограф» рентген аппараата уонна «Флюоро-Програф-РП» көһө сылдьар систиэмэ уурулуннулар.
Онон, эмтэнээччилэр уонна быраастар үөрүүлэрэ муҥура суох. Саҥа тэриллэри туһаныы ыарыыны быһаарар кыах улаатарыгар уонна чинчийии кэмэ кыччыырыгар көмөлөһүө.
СӨ Доруобуйаҕа харыстабылын министиэристибэтэ иһитиннэрбитинэн, бастакы сүһүөх эмтиир тэрилтэлэри модернизациялааһын бырагырааматынан быйыл рентген аппарааттарынан Хаҥалас киин балыыһатын диагностикаҕа отделениета, Айхал куорат балыыһата, Тиксии поликлиниката, Мииринэй улууһун поликлиниката, Чернышевскай куорат балыыһата, Депутатскай бөһүөлэк поликлиниката, Чурапчы улууһун киин балыыһатын терапияҕа отделениета, Баатаҕай Алыыта бөһүөлэк уонна Сааскылаах сэлиэнньэ поликлиникалара хааччыллыахтара.
Надежда ЕГОРОВА, «Саха сирэ», edersaas.ru