СӨ дьарыктаах буолуу сулууспатын уорганнара быйыл 2 тыһыынчаттан тахса киһини, ол иһигэр 3 саастарыгар диэри оҕолорун көрөн олорор уонна 7 сааһыгар диэри оҕолоох ийэлэри үөрэтэр былааннаахтар.
edersaas.ru
Үөһээ Халыма улууһугар “Демография” национальнай бырайыагынан профессиональнай үөрэххэ 5 ийэ сайаапка түһэрдэ. Үстэригэр диэри саастаах оҕолорун көрөн олорор икки ийэ хайыы үйэ үөрэҕин ситиһиилээхтик түмүктээн, баҕарар идэтигэр диплом ылла.
Евгения Селюкова оройуоннааҕы суукка үлэлиир уонна “Юриспруденцияҕа” эбии үөрэннэ. Онтон Оксана Абдуллоева маҕаһыыҥҥа атыыһыттыыр, инникитин нэһилиэнньэ социальнай көмүскэлин управлениетыгар социальнай үлэһитинэн киирэргэ былааннанар, онон “Социальнай үлэ исписэлииһэ” идэни баһылаата. Кинилэр интэриниэккэ киирэр кыахтара суоҕун учуоттаан, Үөһээ Халыма улууһун нэһилиэнньэ дьарыктаах буолуутун киинэ үлэ усулуобуйатын тэрийэн, ыраахтан олорон үөрэнэр кыахтаннылар.
Надежда ЕГОРОВА, «Саха сирэ», edersaas.ru