Үөһээ Бүлүү уола Георгий Семенов «Полиметалл» хампаанньа геолог-документатора
Үөһээ Бүлүүттэн төрүттээх Георгий Семенов Полиметалл хампаанньа Нежданинскайдааҕы учаастагар геолог-документаторынан үлэлиир. Кини бу идэтин таларыгар хаһан даҕаны саарбахтаабатаҕа.
Геолог-документатор үлэтэ бырамыысыланнас сайдыытыгар сүрүн оруоллаах. Кини скважинаттан ылыллыбыт хайа боруодатын үөрэтэр.
Георгий Үөһээ Бүлүү улууһун Мэйик нэһилиэгэр төрөөбүт, 2006 сыллаахха Аллараа Бэстээххэ көһөн кэлбит. Оҕо эрдэҕиттэн айылҕаҕа сылдьарын, бултуурун олус сөбүлүүр эбит. Оскуоланы бүтэрэн баран ХИФУ геологоразведочнай факультетыгар туттарсан киирбитэ. Ол эрээри бу үөрэҕин кини бүтэрбэтэҕэ. Төһө да ситэ үөрэммэтэх буоллар, кини син биир геолог буолар баҕа санаалааҕа. Аармыйаҕа сулууспалаан баран Хаандыгатааҕы геолого-разведочнай техникумҥа үөрэнэ киирбитэ. Бу кини идэтин таларыгар сүрүн оруолу оонньообута. «Идэни талыыга техникумтан саҕалыыр ордук эбит диэн санааҕа кэлбитим» — диэн с этэр Георгий. Үс сыллаах техникумҥа үөрэнэн кини устудьуоннар сэбиэттэрин бэрэссэдээтэлинэн үлэлээбитэ. Дьону кытта алтыһыытыгар, кэлин үлэтигэр-хамнаһыгар үтүө өрүттэри хаалларбыта. Томпо улууһугар баар Нежданинскайдааҕы көмүс хостуур учаастакка быраактыкатын ааспыта. Бу быраактыкаҕа сылдьан кини манна үлэлиэхпин сөп эбит диэн бэйэтигэр эрэл санаата күүһүрбүтэ.
Полиметалл Нежданискайдааҕы учаастагар үгүстэрэ эдэр үлэһиттэр. Холобур, кылаабынай геолог Дмитрий Чужинов 35 эрэ саастаах, оттон карьер учаастактааҕы геолога 24 cаастаах. Тэрилтэ эдэр дьону өйүүрүн таһынан, кини эдэрдэргэ эрэнэрэ көстөр. Георгий кэпсээнинэн, кэлэктиипкэ эйэлээх сыһыан баар. Үлэҕэ киирэригэр кини аҕа саастаах бииргэ үлэлиир дьонун өйөбүллэрин билэн салгыы үлэлииригэр кынаттаммыт. Онон кини ситиһиилээх үлэтигэр кэлэктиип оруола улаханын бэлиэтиир. Уопсайа учаастакка 26 геолог үлэлиир. Симиэнэҕэ 13-түү буолан. Үлэ баахтабай көрүҥүнэн барар.
— Мин тута салайааччы буоларга таласпаппын, үлэҕэ кыраттан саҕалыыр ордук, — диэн этэр кини. – онон салгыы үрдүк үөрэххэ туттарсыам, — диэн баҕа санаатын этэр. Түгэнинэн туһанан, кини үөрэммит техникумун бары преподавателлэригэр, үлэһиттэригэр барҕа махталын тиэрдэр. ону таһынан саамай улахан махталын тириэнньэригэр Евгений Аркадьевич Голиковка уонна кураторыгар Анна Михайловна Прокопьеваҕа тиэрдэр.
Ульяна ЗАХАРОВА, edersaas.ru