Үөһээ Бүлүү улууһун үөрэнээччилэрэ дьиэлэриттэн ырааппакка СЫП-таатылар

Бүгүн Үөһээ Бүлүү улууһун  нэһилиэктэриттэн 20 үөрэнээччи Бүлүү улууһун Кыһыл Сыыр бөһүөлэгэр  «ЯТЭК» уонна «Сахатранснефтегаз» курдук бөдөҥ тэрилтэлэр эбийиэктэрин көрө «күөх төлөн» тэбэр сүрэҕэр сырыттылар.  Бу анал бырайыагы «Үөһээ Бүлүү» хаһыат эрэдээксийэтэ уонна улуустааҕы үөрэх управлениета «Я — ИНЖЕНЕР» диэн өрөспүүбүлүкэтээҕи түмсүүлүүн кыттыһан тэрийдилэр.

Үөрэнээччилэр сарсыарда 8 чаастан Үөһээ Бүлүүттэн араҕан, 10 чааһы ааһыыта Кыһыл Сыырга тиийэн, Орто Бүлүүтээҕи гаас баайдаах сири туһаҕа таһаарар «ЯТЭК» АУо эбийиэктэригэр сырыттылар. Ол курдук, «ЯТЭК» хостуур буоллаҕына, «Сахатранснефтегаз» АУо ону өрөспүүбүлүкэ ыалларыгар тиэрдэр.

Оҕолору «ЯТЭК» хампаанньа Кыһыл Сыырдааҕы  производственнай-тэхиньиичэскэй отделын начаалынньыга Валерий Горовик уонна бырамыысыланнаска куттал суох буолуутун отделын кылаабынай исписэлииһэ Павел Сидоршин  көрсөннөр, аан маҥнай  эбийиэктэргэ киириэх иннинэ сэрэхтээх буолуу ирдэбиллэрин билиһиннэрдилэр. Оҕолор болҕомтолоохтук иһиттилэр уонна бэлиэтэннилэр. Мунаахсыйар боппуруостарын тута ыйыталаһан, хоруй ыллылар.

Билсиһии кэнниттэн салгыы оптуобуска олорон, гааһы таҥастыыр анал комплекска тиийиэхпит иннинэ, Орто Бүлүүтээҕи гаас баайдаах сири туһаҕа таһаарыыга 1982 с. туруоруллубут буровой скважина макетын көрөн, гаас хостонуутун историятын кытта билистилэр.   Валерий Горовик  бу  скважина хас сыллаахха туруоруллубутуттан саҕалаан маны оҥорууга төһө киһи үлэлээбитигэр тиийэ кэпсээтэ. Бу скважина дириҥэ 6519 м тэҥнэһэр. Салгыы үлэлии турар скважинаны көрдөрдүлэр. Гаас сир анныттан ыгыллан тахсар уонна анал станцияҕа тиийэн ыраастаныллар. Онтон тыһыынчанан биэрэстэ усталаах турбанан Дьокуускайга, Бүлүүгэ, Үөһээ Бүлүүгэ тиийэр, өссө салгыы Өлүөнэ эбэни туораан илин эҥээргэ тахсар.

Эбиэттээн баран, «Сахатранснефтегаз» АУо эбийиэктэрин көрө бардыбыт. Биһигини хампаанньа  Кыһыл Сыырдааҕы гааһы тиэрдэр уонна хостуур управлениетын линейнэй көрөр-истэр сулууспатын производственнай-тэхиньиичэскэй отделын  начаалынньыга Виталий Виноградов  арыаллаата уонна эбийиэктэр тустарынан билиһиннэрэн кэпсии истэ. «Сахатранснефтегаз» АУо хостонуллубут гааһы өрөспүүбүлүкэ үрдүнэн туһанааччыларга тиэрдэр. Ол курдук, Виталий Валентинович оҕолорго Кыһыл Сыыр — Мастаах магистральнай сүрүн утаҕы уонна Бүлүү куоракка барар гаас ситимин  (сүрүн бастакы уонна иккис гаас ситимнэригэр холбонуутун) көрдөртөөтө, кэпсээтэ. Онон оҕолор бу иннинэ Бүлүү федеральнай суолунан айаннаан иһэн,  Кыһыл Сыыр туһаайыытынан күлүбүрүү умайар «күөх төлөнү»  көннөрү көрөн кэбиһэр буоллахтарына, анал эбийиэктэргэ сылдьан элбэҕи биллилэр-көрдүлэр. 

Үөрэнээччилэр санаалара

Николай Игнатьев, Оҥхой оскуолатын 9-с кылааһын үөрэнээччитэ:

— Олус көдьүүстээх сырыы буолла. Барытын сөҕө-махтайа көрдүм. Бу сырыы кэнниттэн бырамыысыланнас идэтигэр үөрэнэ барар санаа киирдэ. Онон мантан ыла үөрэхпэр кыһаннахпына табыллыыһы.

Афанасий Чириков, Мэйик оскуолатын 9-с кылааһын үөрэнээччитэ:

— Гаас эбийиэктэрин  көрөн, олус астынным. Бу эбийиэктэргэ сылдьан баран, Бүлүү өрүс уҥуор сытар нэһилиэктэргэ  гаас оттук тиийэрэ буоллар бэрт да буолуох эбит диэн санааҕа кэллим.

Леонард Корякин, Хоро оскуолатын 10-с кылааһын үөрэнээччитэ:

— Бэрт интэриэһинэй сырыы буолла.  Бырамыысыланнас идэтин баһылыыр санаа үүйэ-хаайа тутта.

Ньургун Деллохов,Үөһээ Бүлүүтээҕи  2-с №-дээх оскуола  9-с кылааһын  үөрэнээччитэ:

— Гаас хайдах туһаҕа таһаарылларын биллим-көрдүм. Сиртэн хостонон баран, ыал билиитэтигэр  тиийиэр диэри элбэх дьайыыны ааһар эбит диэн өйдөөтүм. Гаас эбийиэктэрин кэрэхсээн көрдүм.

Александр ТАРАСОВ.

Ааптар хаартыскаҕа түһэриилэрэ.

Үөһээ Бүлүү – Кыһыл Сыыр – Үөһээ Бүлүү.