Үөһээ Бүлүү оройуонугар 2022 сылга ыытыллыахтаах үбүлүөйдээх Олоҥхо ыһыаҕар бэлэмнэнии саҕаланна. Национальнай бырааһынньыгы ыытыы өрөспүүбүлүкэ бэлиэ түгэнин – Саха АССР тэриллибитэ 100 сылын кытта сибээстээх.
Олоҥхо ыһыаҕар бэлэмнэниини кытта оробуочай командировкатын кэмигэр Айсен Николаев билистэ. Өрөспүүбүлүкэ баһылыга сүрүн тэрээһиннэр барар миэстэлэрин көрдө уонна эрэгийиэн миниистирдэрин кэбиниэтигэр уонна муниципальнай былааска сорудахтары биэрдэ.
Оройуон баһылыга Владимир Поскачин этэринэн, Саха АССР төрүттэммитэ 100 сылыгар ыытыллыахтаах Олоҥхо ыһыаҕар Үөһээ Бүлүүгэ кэккэ култуурунай уонна религия эбийиэктэрин тутар былааннаахтар. Итилэр ортолоругар – күнү көрсөр сир, кымыһы иһэр киин, “Аал луук мас”, түрүбүнэлээх киин түһүлгэ, киирэр аарка. Маны сэргэ оройуон киинигэр Олоҥхо дьиэтин дьэндэтиэхтэрэ.
Сүрүн тэрээһиннэр Түгэхтэй, Кырбый уйата, Төҥүргэстээх диэн чугас сирдэргэ буолуохтара. Манна 2017 сыллаахха “Манчаары оонньуулара” спорт национальнай көрүҥнэригэр ХХ спартакиадаҕа көньүүһүнэлээх уонна 1000 миэстэлээх трибуналаах ипподром тутуллубута. Олоҥхо ыһыаҕар АЛРОСА дивиденинэн оройуон былаастара манна тиийэр суолу тутуохтарын баҕарбыттара да, быйыл хампаанньа ылыммыт кириисиһи утары миэрэлэринэн тутууну үбүлээһин быһаарылла илик. Айсен Николаев суол балаһатын кутарга сүбэлээтэ.
Саха сирин баһылыга үөһээ бүлүүлэр үбүлүөйдээх ыһыаҕы 2022 сыл бэс ыйын 24 күнүттэн 26 күнүгэр диэри ыытарга торумнаабыттарын уонна бу күннэргэ Саха сиригэр 2008 сылтан ыытыллар үгэс буолбут “Олоҥхо сиригэр ЮНЕСКО шедеврдэрин көрсүү” норуоттар икки ардыларынааҕы төрдүс бэстибээли тэрийиини өйөөтө. Төрдүс төгүлүн аан дойду араас норуоттара бэстибээлгэ ЮНЕСКО испииһэгэр киирэр бэйэлэрин култуурунай нэһилиэстибэлэрин сүдү айымньыларын билиһиннэриэхтэрэ, ол иһигэр саха Олоҥхото эмиэ баар.
Киирбит этиилэри болҕомтоҕо ылан, Айсен Николаев сир-уот бырайыагын оҥорууну түргэтэтэргэ, ороскуоттар симиэтэлэрин силигин ситэрэн, бу сыл бүтүөр диэри Олоҥхо ыһыаҕын тэрээһиннэрин былаанын бигэргэтэргэ сорудахтаата.
Чугастааҕы биэс сылга Олоҥхо ыһыаҕа ыытыллыахтаах оройуоннарын испииһэгэ 2019 сыллаахха торумнаммыта. Коронавирус саҥа дьаҥа тарҕаммытынан үөскээбит уустук балаһыанньанан быйыл болдьоххо уларытыылары киллэрбиттэрэ. Өлүөхүмэҕэ ыытыллыахтаах национальнай бырааһынньыгы 2021 сылга көһөрбүттэрэ. Онтон салгыы Олоҥхо ыһыаҕа Үөһээ Бүлүүгэ, Өймөкөөҥҥө, Нерюнгри оройуоннарыгар ыытыллыахтаах.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата.
Хаартыска: Мария Васильева түһэриитэ
Бэлэмнээтэ Женни СТРЮКОВА.