Үөһээ Бүлүү улууһа “Мобильнай учуутал” бырайыагы киллэрэн эрэр...
Олох-дьаһах

Үөһээ Бүлүү улууһа “Мобильнай учуутал” бырайыагы киллэрэн эрэр

Тыа сирин оскуолаларыгар учуутал тиийбэтэ уруккуттан биллэр. Тустаах боппуруоһу быһаарар сыалтан Үөһээ Бүлүү улууһа “Мобильнай учуутал” бырайыагы киллэрэн эрэр. Ити туһунан улуустааҕы үөрэх управлениетын начаалынньыга Спиридон Борбуев иһитиннэрэр.

edersaas.ru

Күн бүгүн тустаах улуус 40-ча педагогическай исписэлиискэ наадыйар. Ордук нуучча тылын уонна литэрэтиирэтин, омук тылын, математика, биология, химия, муусука, технология учууталлара тиийбэттэр эбит. Дойду сорох атын эрэгийиэннэригэр “Мобильнай учуутал” бырайыагы туһанан, тыа сирин оскуолаларын исписэлиистэринэн хааччыйаллар эбит. Үрдүк таһымнаах учууталлар цифровой технологияны туһанан итиэннэ кэмиттэн-кэмигэр оскуолаҕа миэстэтигэр тиийэн үөрэтэллэр.

Төһө даҕаны үөрэтии дистанционнай буолбутун иһин, учуутал үөрэнээччитин илэ көрүөхтээх. Ол иһин кэмиттэн-кэмигэр оскуолаларга баран уруоктары олоҕурбут көрүҥүнэн (очно) ыытыахтаахтар, оҕону кытта билсиэхтээхтэр. Маҥнайгы уруоктары саҕалыахтарын иннинэ суоллаах оскуолаларга тиийэн билиһиннэрэбит. Бэйэбит массыынанан таһабыт. Дьыала ороскуотугар буолбатах. Биһиги оҕону үөрэтэр эбээһинэстээхпит. Онон төһө кыалларынан сөптөөх билиини биэрэ сатыахтаахпыт. Билигин сорох тыа нэһилиэктэригэр солбукка уонна эбии чаас биэрэр сыалтан, холобура, алын кылаас учууталынан чэпчэки биридимиэттэр диэн биологияны, географияны үөрэттэриэхтэрин сөп. Дьиҥэр, биридимиэт барыта уустук, анал үөрэхтээх исписэлиистэр үөрэтэллэрэ ирдэнэр.

“Мобильнай учуутал” бырайыакка кимнээх хапсыахтарын сөбүй? Бастатан туран, физика, химия, география курдук биридимиэттэргэ үксүгэр аҕыйах чаас көрүллэр. Бу биридимиэттэр учууталлара эбии чаас быһыытынан ылыахтарын сөп. Иккиһинэн, саҥардыы биэнсийэҕэ тахсыбыт учууталлар. Үсүһүнэн, биир сыллаах айар (творческай) уоппускаҕа сылдьар учууталлар. Биллэн турар, уһуннук биэнсийэҕэ олорбут, аныгы үөрэх федеральнай судаарыстыбаннай ыстандаарт (ФГОС) уларыйыытыттан тэйэ быһыытыйбыт учууталларга уустуктардаах буолуоҕа. Онон уон сыллааҕыта биэнсийэҕэ тахсыбыттар үлэлииллэригэр ыарахан буолуон сөп”, — диэн үөрэх управлениетын начаалынньыга иһитиннэрэр.

Бырайыакка учууталлары куонкурус түмүгүнэн ылаллар. Сүрүн ирдэбилэ – үрдүк хаачыстыбалаахтык үөрэтэр итиэннэ биэс сылтан кырата суох педагогическай ыстаастаах буолуохтаах. Үөһээ Бүлүүнү сэргэ, чугастааҕы улуустар учууталлара хапсыахтарын сөп диэн этэллэр.

 

Людмила ПОПОВА, “Саха сирэ” хаһыат, edersaas.ru

0
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

три × четыре =