Олунньу 10 күнүгэр Үөһээ Бүлүү оройуона төрүттэммитэ 83 сылын туолла.
edersaas.ru
Үөрүүлээх тэрээһин чэрчитинэн, сарсыарда 11 чааска улуустааҕы култуура киинин саҥа дьиэтэ арылынна. Түгэнинэн туһанан, «Биир ньыгыл Арассыыйа» баартыйа 5 мөл. 569 тыһ. солк сэртипикээт туттарда.
Күн иккис аҥаарыгар үтүө үгэскэ кубулуйбут бастыҥнары чиэстиир тэрээһин ыытылынна. Ааспыт сыл түмүгүнэн, бастыҥ үлэлээх баһылыгынан Туобуйа нэһилиэгин баһылыга Степан Алексеев ааттанна. «Бастыҥ дьаһалтанан» Кэнтик нэһилиэгин дьаһалтата, «Бастыҥ дьаһалта үлэһитэ» номинацияҕа кыайыылааҕынан Нам нэһилиэгин исписэлииһэ Сардана Тойтонова, «Бастыҥ бааһынай хаһаайыстыбанан» «Уоттаах» (баһылык Валерий Михалев) хаһаайыстыба, «Бастыҥ салайааччынан» ОДьКХ тэрилтэ дириэктэрэ Василий Николашкин, «Кэскиллээх салайааччы» номинация хаһаайынынан улуус дьаһалтатын УПСиРИ МКУ салайааччыта Альберт Иванов уонна да атыттар ааттаннылар.
Ону таһынан, муниципальнай лауреаттар ааттарын үрдүкү сыанаттан ааттаатылар. Ол курдук, И.Н.Барахов аатынан бириэмийэни социальнай, экономическай сайдыыга кылаатын иһин «Бүлүү» Упрдор начаалынньыгар Николай Андреевка, Ю.Н.Прокопьев аатынан бириэмийэни тутууга уонна бырамыысыланнаска кылаатын иһин «Стерх» генеральнай дириэктэрин солбуйааччытыгар Иван Сидоровка туттардылар.
Бу күн Арассыыйаҕа Үтүө дьулуур, Саха сиригэр Дьарыктаах буолуу, улууска Бигэ туруктаах буолуу сыллара үөрүүлээх быһыыга-майгыга арылыннылар.
Мария Васильева, Үөһээ Бүлүү, edersaas.ru