Бүгүҥҥү иһитиннэриибитин үөрүүлээх сонунтан саҕалыыбыт. Ол курдук, Үөһээ Бүлүү улууһугар икки коронавирустаабыт киһи балыыһаҕа көрдөрүнэн, тутатына күүстээх эмтэниини ааспыттарын түмүгэр, бүгүн бүтэһик анаалыстара вирустара этэҥҥэ сүппүт, үтүөрбүттэр диэн көрдөрбүт.
edersaas.ru
Бүгүн дьиэлэригэр тахсаллар. Уодаһыннаах ыарыыны кыайбыт үрүҥ халааттаах аанньалларбытыгар улахан махтал.
Техникум обсерваторыгар 1 киһи сытар.
Провизорнай отделениеҕа кэтэбилгэ биир киһи сытар.
Бэйэни хааччаахтаан олоруу режимигэр дьиэлэригэр 6 киһи олорор.
Сарсыҥҥаттан улууспутугар хааччахтааһын миэрэлэр кыралаан уһуллан барыахтара. Ол курдук күүстээх санитарнай ыраастаныы кэнниттэн сапчаас, таҥас атыылыыр маҕаһыыннар арыллаллара көҥүллэнэр. Сибиэһэй салгыҥҥа дьарыктанарга стадион эмиэ сарсыҥҥыттан арыллыа.
Төһө да балаһыанньабыт тубустар, ыарыы тарҕаныытын куттала өрөспүүбүлүкэбит үрдүнэн син биир баар. Онон күндү биир дойдулаахтарбыт, КУОРАТТАН КЭЛБИТ ДЬОН САМОИЗОЛЯЦИЯНЫ ХАЙААН ДА ТУТУҺУҤ, улуус таһыгар барартан туттунуҥ! Эппиэтинэстээхтик сыһыаннаһыҥ!
Барыбытыттан эппиэтинэстээх буолуу, биир өйгө-санааҕа түмсүүлээх буолуу ирдэнэр.
Үөһээ Бүлүү улууһун суһал штабын нүөмэрэ – 8(41133) 41501.
Улуустааҕы балыыһа
call-киин нүөмэрэ 88006004561
Чэгиэн сылдьыҥ!Бэйэ бэйэни харыстаһыҥ!
Үөһээ Бүлүү улууһун дьаһалтатын суһал штаба