Үөһээ Бүлүү Ороһутугар бүгүн, бэс ыйын 1 күнүгэр, 120 уонна 70 миэстэлээх оскуола-саад бастакы сыбаайата түстэ. Эбийиэк «Развитие образования Республики Саха (Якутия) на 2020-2024 годы и на плановый период до 2026 года» диэн судаарыстыбаннай бырагырааманан тутуллуоҕа.
— Ыам ыйыгар 49,9 мөлүйүөн суумаҕа тутуу үлэтин ыытарыгар «Силим» хампаанньаны кытта судаарыстыбаннай хантараак баттаспыппыт. Сыл бүтүөр диэри бэдэрээттиир тэрилтэ вертикальнай планировканы, цокольнай сабыыны уонна носуос ыстаансыйатын бүтэриэхтээх, — диэн СӨ судаарыстыбаннай сакаастыыр сулууспатын бырайыактыыр управлениетын салайааччыта Михаил Черов иһитиннэрэр.
Барыта 3172,26 кв.м. иэннээх икки этээстээх тутуу Сэбиэскэй уул., 21 №-дээх аадырыһыгар туруоҕа. Тутуу икки блоктаах: 120 үөрэнээччигэ оскуола уонна 70 иитиллээччигэ дьыссаат.
Оскуола иэнэ — 2228,68 кв.м. Бастакы этээһигэр тиэхиньиичэскэй-бытовой хостор, остолобуой, алын кылаастар, мастарыскыай баар буолуоҕа. Оттон иккис этээһигэр — улахан кылаастар, успуорт саала, аактабай саала уонна ааҕар саалалаах бибилэтиэкэ.
Дьыссаат иэнэ — 943,58 кв.м. Бастакы этээһигэр кыра бөлөххө сылдьар 20 оҕоҕо анаан музыкальнай уонна физкултууралыыр саалалар, методкабинет баар буолуоҕа. Иккис этээһигэр — улахан икки бөлөхтөргө анаан хостор, күүлэйдиир веранда уонна логопед кабинета. Аһы таһарга анаан кыра лифт үлэлиэҕэ.
СИА.