Үөһээ Бүлүүгэ И.Н. Барахов аатынан 1-гы оскуола оҕолоро сыл аайы «Кыһыл кинигэҕэ» киирбит кыыллары мууhунан оҥороллор. Быйыл 32 муус оҥоһук оскуола тэлгэһэтин киэргэттэ. Онтон 8-а ураты айымньы: Үөһээ Бүлүүгэ буолуохтаах Манчаары оонньууларын уонна Олоҥхо ыһыаҕын бэлиэлэрэ, Эһээ Дьыл уобараһа, Дьыл Оҕуһа о.д.а.
«Бу биhиги 2006 с. төрүттээбит үгэспит. Устудьуоннуу сылдьан Дьокуускайга Ленин болуоссатыгар Саҥа дьыл саҕана турар муус оҥоһуктары сэргии көрөрүм. Манна үлэлии кэлээт, бу идиэйэни көҕүлээн, олоххо киллэрбиппит. Бастаан утаа кыратык алдьаталлара, ону хос оҥорон иhэрбит. Итиэннэ оҕолор бэйэлэрин оҥоһуктара буолан, харыстыыллар. Онон бу үгэс иитэр суолталаах. Саас күн уота уулларыар диэри тураллар. Оҕолор маастар Ньургустаан Бойтунов ыйыытынан-кэрдиитинэн оҥороллор», — диэн оскуола дириэктэрэ Анатолий Захаров edersaas.ru сайтка кэпсээтэ.
Үтүө үгэс салҕанан, дириҥээн истин!
edersaas.ru
Хаартыска Спиридон Борбуев Фэйсбукка страницатыттан.