Күрэхтэһии иккис күнэ түмүктэннэ. Намнааҕы спорт былаһааккатыгар многоборьеҕа күрэхтэһээччилэр күн аайы саҥаттан саҥа рекортары олохтоон, тэрийээччилэри уонна көрөөччүлэри үөрдэллэр.
Бэҕэһээ, от ыйын 7 күнүгэр, хотугу многоборье сүгэни быраҕыы көрүҥэр Нерюнгри кыыһа Анна Кинчак 93 миэтэрэ 73 см ыраахха кыыратан, көрдөрүүнү тупсарбыта. Оттон уолаттарга национальнай многоборьеҕа Үөһээ Бүлүү бастакы хамаандатын аатыттан кыттар Айсен Ботуев тутум эргииригэр 111 төгүл күөрчэх ытыгыныы кулахачыҥнаан, саҥа рекорду олохтообута.
Айсен иккис күн эмиэ үөһээ бүлүүлэр үрдүк үөрүүлэригэр тааһы көтөҕүүгэ тэҥнээҕин булбата. 83,8 киилэ ыйааһыннаах, сымыыт курдук бөкүнүк тааһы 222 м 90 см ыраахха илдьэн, Манчаары оонньууларын рекордун оҥордо. Айсены аҕата, Нам орто оскуолатын физкултуураҕа учуутала Гаврил Сергеевич кыра эрдэҕиттэн дьарыктаабыт. Төрөөбүт түөлбэтигэр буолар күрэхтэһиигэ аҕата батыһа сылдьан, сүбэлиир-амалыыр. А.Ботуевтан сүүрбэччэ миэтэрэнэн (көрдөрүүтэ — 201 миэтэрэ) хаалан, Анаабыр хоһууна Григорий Туприн иккис буолла. Манна таарыйа эттэххэ, улахан дьоҥҥо 115 киилэлээх тааһы Любомир Николаев (Үөһээ Бүлүү-I) 150 миэтэрэҕэ тиэрдэн, утарсааччыларын ырааҕынан бырахта.
Хотугу многоборецтар даҕаны хаалсыбатылар. Бүлүү куорат 1-кы №-дээх оскуолатын быйыл үөрэнэн бүтэрбит 16 саастаах Григорий Мальцев маамыктаны субуруччу 37 төгүл таба быраҕан, уолаттарга урукку рекорду 6 табыынан тупсарда. Оттон дьахталларга Лариса Евдокимова (Үөһээ Бүлүү-I) утуу-субуу 12-тэ иилэ быраҕан, быйыл саас кулун тутар ыйга олохтоммут рекорду 1 табыынан аһарда.
Лариса — хотугу многоборьеҕа СӨ уонна РФ спордун маастара, Манчаары оонньууларыгар Бүлүүгэ 2009 с. — I, Чурапчыга 2013 с. III миэстэлэри ылбыта. Сарсын хотугу многоборьеҕа киирсээччилэргэ биир бүтэһик көрүҥ – наартаны үрдүнэн ойуу хаалла. Л.Евдокимова бу көрүҥҥэ олохтообут рекорда (311 ыстаныы) билиҥҥэ диэри алдьаммакка турар. Онон үөһээ бүлүүлэр многоборье көрүҥнэригэр Лариса Евдокимоваҕа уонна Айсен Ботуевка улаханнык эрэнэллэр. Национальнай многоборьеҕа уолаттарга өссө Үөһээ Бүлүү 2-с хамаандатыттан кыттар Айхал Бюлтясов үс бастыҥ иһигэр иһэр. Уолаттар иккиэн сарсын 1 тыһ. миэтэрэҕэ сүүрүүгэ үчүгэйдик кытыннахтарына, биир дойдулаахтарын үөрдэр чинчилээхтэр.
Василий НИКИФОРОВ, «Саха сирэ» хаһыат, edersaas.ru
Ааптар хаартыскаҕа түһэриилэрэ.