Үөһээ Бүлүү улууһун биир уһук нэһилиэгэр — Маҥааска, «Модернизация первичного звена объектов здравоохранения» бырагырааманан саҥа балыыһа тутуллуохтаах. Бу күннэргэ суолу баттаһа тутуу матырыйаалын нэһилиэккэ тириэртилэр диэн улуус дьаһалтатын пресс-сулууспата иһитиннэрдэ.
— Киэһэ хойут да буоллар, нэһилиэк дьоно муста охсон, бары саба түһэн, түүн 12 чаас ааһыар диэри сүөкээтилэр. Үгүс көлүөнэ ыра санаата, нэһилиэнньэ тыын боппуруоһа быһаарыллан, саҥа балыыһа тутуллан, үрүҥ халааттаах аанньаларбыт үлэлэригэр, дьоммут-сэргэбит доруобуйатын туруга тупсарыгар, бу тутуу сүҥкэн күүс буолуо. Суол хааччахтаммыт кэмигэр да иҥнэн олорбокко, Үөһээ Бүлүү улууһун киин балыыһатын кылаабынай бырааһа Сардана Николаевна Павлова салайааччылаах хамыыһыйа тахсан, кэлбит тутуу матырыйаалын олохтоох нэһилиэк дьаһалтатын баһылыгын солбуйааччы Аркадий Гаврильевич Егоровтыын көрдүлэр-иһиттилэр. Тутуллуохтаах балыыһа сирин, үлэ хаамыытын быһаарыстылар, — диэн Маҥаас нэһилиэгин олохтоохторо кэпсээтилэр.
edersaas.ru