Бүгүн Үөһээ Бүлүү сэлиэнньэтин култууратын дьиэтигэр СӨ норуодунай суруйааччыта, РФ уонна СӨ култууратын үтүөлээх үлэһитэ Сэмэн Руфов төрөөбүтэ 90 сылыгар аналлаах тэрээһин буолла.
edersaas.ru
Үбүлүөйдээх тэрээһиҥҥэ улуус сэбиэтин дьокутааттарын бэрэссэдээтэлэ Семен Михалев, Тамалакаан нэһилиэгин баһылыгын солбуйааччы Максим Кокоринов, Нам улууһунааҕы педагогическэй коллежд преподавателэ, «Сэмэн Руфов тылбаастара — саха норуотун киэн туттуута» кинигэ ааптара Прасковья Баянаева уонна Сэмэн Руфов оҕолоро кыттыыны ылан, эҕэрдэ тылы эттилэр, кылгас ахтыы оҥордулар.
Дьоро киэһэни Тамалакаан нэһилиэгэр өр кэмнэргэ баһылыгынан үлэлээбит, Сэмэн Руфов биир дойдулааҕа Зоя Федорова иилээн-саҕалаан ыытта.
Улуустааҕы дьокутааттар сэбиэттэрин бэрэссэдээтэлэ Семен Михалев: «Сэмэн Руфовка аналлаах тэрээһиннэр Дьокуускайга үрдүк тэрээһиннээхтик аастылар. Биһиги онтон үөрэбит, сүргэбит көтөҕүллэр. Улуус баһылыга Владимир Поскачин Сэмэн Тиитэбис урут тахсыбыт уонна тахса илик айымньыларын хомуурунньугун таһаарар соргу ылыммыта. Эһиилги бүддьүөппүтүгэр итини таһаарыыга үп көрөн олоххо сотору киллэриэхпит. Итини тэҥэ, төрөөбүт нэһилиэгэр баар мусуойу эмиэ хайаан даҕаны өрөмүөннүөхпүт», — диэн эппитин мустан олорооччулар ытыс тыаһынан уруйдаатылар.
Салгыы сүрүн дакылааты Прасковья Баянаева Сэмэн Руфов ураты, чаҕылхай тылбаастарын туһунан олус интэриэһинэйдик кэпсээтэ. «Сэмэн Руфов тылбаастара олус уратылар, чаҕылхайдар, бу кини ураты талааннааҕын көрдөрөр», — диэн олус сөптөөхтүк эттэ.
Салгыы Сэмэн Руфов «Алта нэһилиэк уолабын» диэн хоһоонугар олоҕуран, Харбалаах, Ороһу, Тамалакаан, Нам, Дүллүкү, Балаҕаннаах нэһилиэктэрин баһылыктара биир-биир тахсан, Сэмэн Руфов туһунан дьоһун ахтыыны, эҕэрдэ тылы эппиттэрэ олус сонун, ураты буолла.
Үөдүгэй нэһилиэгин баһылыга, суруналыыс, суруйааччы Валерий Васильев — Муттуххай Бороҥ эҕэрдэ этэн баран, суруйааччыга анаан суруйбут «Дэлбиргэ салама» хоһоонун ааҕан бэлэх уунна. «Үөһээ Бүлүү» хаһыат эрэдээктэрэ Александр Тарасов ахтыы тылыгар Семен Тиитэбис олохтоох эрэдээксийэҕэ 1963 сылтан 1973 сылга диэри корректорынан үлэлээбитин туһунан ахтыы оҥордо.
Түмүктүүр эҕэрдэ тылы Сэмэн Руфов оҕолоро Валерий Семенович, Геннадий Семенович, Максим Семенович, Татьяна Семеновна эттилэр. Өрөспүүбүлүкэ үрдүнэн аҕаларыгар аналлаах тэрээһиннэр үрдүк таһымнаахтык ыытыллыбыттарыгар күүс-көмө буолбут биир дойдулаахтарыгар барҕа махтал тылларын анаатылар.
Бу ураты күн суруйааччы ылбаҕай тыллаах, олоҕу туойбут хоһооннорун «Санаа ситимэ» литературнай-поэтическэй түмсүү аахтылар, ырыаҕа ылламмыт ырыалара дьиэрэйэ көттүлэр. Дьоро киэһэ түмүгэр улуустааҕы библиотека кэлэктиибин көҕүлээһининэн, Сэмэн Руфовка анаан «Пегас хайатын дабайан» улуустааҕы хоһоону ааҕыыга куонкурус уонна «Төрөөбүт тылын кынат оҥостон» улуустааҕы конференция кыайыылаахтарын наҕараадалаатылар.
Анивера Акимова, edersaas.ru