Култуура Маны аах

Үөһээ бүлүүлэр Олоҥхо ыһыаҕар бэлэмнэнэллэр

Бэҕэһээ, ыам ыйын 13 күнүгэр, Үөһээ Бүлүүгэ үбүлүөйүнэй Олоҥхо ыһыаҕын ыалдьыттарын түһэрэн хоннорор, аһатар сирдэрин тэрийиигэ улахан  семинар буолан ааста.

Семинарга дьону хоннорор, олордор өҥөнөн дьарыктанар (гостиничный бизнес) урбаанньыттар, ас-үөл тэрилтэлэрин үлэһиттэрэ, асчыттар, дьиэни куортамҥа биэрэр уонна хорчуоппа тэрийэр дьон көхтөөх кыттыыны ыллылар.

Семинар арыллыытыгар улуус баһылыга Владимир Поскачин бары кыттыылаахтары итиитик-истиҥник эҕэрдэлээтэ уонна бүгүҥҥү семинар спикердарын билиһиннэрдэ.

Саха Өрөспүүбүлүкэтин урбаан, атыы-эргиэн уонна туризм министиэристибэтин үлэһиттэрэ, семинар спикердара үөһээ бүлүүлэргэ дьону көрсүүгэ улахан сорук турбутун туһунан тоһоҕолоон, сүрүн ирдэбиллэри билиһиннэрдилэр.

Ыалдьыттар астарын-үөллэрин тэрийиигэ сүрүн операторынан «Сэргэлээх» ас-үөл комбината буолбутун билиһиннэрдилэр.
Эбиэт кэннэ спикердар ыһыах ыҥырыылаах ыалдьыттара түһэр сирдэрин кэрийэн көрдүлэр. Көрүү кэннэ үөрэх тэрилтэлэрин салайааччыларын, үлэһиттэрин кытта көрсөн, сүбэ-ама биэрдилэр.

Бу күн 20-чэ асчыт үөрэх ааһан, 3-4-с үктэлгэ таҕыстылар, аһы киэргэтэн уурууга маастар-кылааска үөрэннилэр.

Уопсайа Үөһээ Бүлүүгэ Олоҥхо ыһыаҕар ыалдьыттыы 10 000 кэриҥэ ыалдьыт кэлэрэ күүтүллэр.
Мантан 2500  киһи ыһыахха кытта кэлэр эбит буоллаҕына, 7500 ыһыахха күүлэйдии, сынньана кэлиэҕэ.

 

Үөһээ Бүлүү улууһун дьаһалтатын пресс-сулууспата

0
0
Telegram @edersaas20