Бүгүн Үөһээ Бүлүү Харбалаах нэһилиэгэр саха чулуу уола Исиидэр Бараахап аатынан СӨ судаарыстыбаннаһын мусуойугар Өрөспүүбүлүкэ күнүн көрсө улуус уопсастыбаннаһын үөрүүлээх миитинэ буолла.
edersaas.ru
Саха норуотун дьоһун бырааһынньыгын көрсө саха чулуу уола, биллиилээх судаарыстыбаннай, бэлитиичэскэй деятель Исидор Барахов мэҥэ тааһыгар сибэкки дьөрбөтүн уурууга Үөһээ Бүлүү улууһун баһылыгын 1-кы солбуйааччы Семен Михалев, СӨ айылҕа харыстабылын миниистирэ Сахамин Афанасьев, Ил Түмэн дьокутаата Марфа Филиппова, СӨ тыа хаһаайыстыбатын уонна ас-үөл бэлиитикэтин миниистирэ Александр Атласов, СӨ үөрэҕин уонна наукатын миниистирин 1-кы солбуйааччы Феодосия Габышева уонна Харбалаах нэһилиэгин баһылыга Илья Кузьмин, о.да.а. кытыннылар. Миитин саҕаланыытыгар Харбалаах нэһилиэгин баһылыга Илья Кузьмин: «Үөһээ Бүлүү олохтоохторун уонна Дьокуускайтан кэлбит дэлэгээссийэни бу буолаары турар, Өрөспүүбүлүкэ күнүнэн эҕэрдэлиибин. Өрөспүүбүлүкэ күнүн чулуу уолбут Исидор Барахов төрөөбүт дойдутугар бэлиэтээн миитиннии турарбыт суолтата олус улахан. Өссө төгүл барыгытын Өрөспүүбүлүкэ күнүнэн Харбалаах олохтоохторун, ыччаттарын ааттарыттан итии-истиҥ эҕэрдэ», – диэн эҕэрдэ тылын эттэ.
Салгыы айылҕа харыстабылын миниистирэ Сахамин Афанасьев:
– Үөһээ Бүлүү улууһун ытык-мааны олохтоохторо, барыгытын Өрөспүүбүлүкэ күнүнэн Ил Дархан Егор Борисов аатыттан эҕэрдэлиибин! Бу Саха сиригэр улахан суолталаах күнүнэн биллэр. Саха сирэ Арассыыйа регионнарыгар биир бастыҥ көрдөрүүлээх регионунан биллэр-көстөр. Инники эрэллээхтик хардыылыыр, сайдар кэскиллээх. Маны ситиһэргэ бары кыах барыта баар. Түгэнинэн туһунан, барыгытын өссө төгүл Өрөспүүбүлүкэ, Күөх Маайынан эҕэрдэлиибин!
Салгыы Үөһээ Бүлүү улууһун баһылыгын 1-кы солбуйааччы Семен Михалев:
— Барыгытын Өрөспүүбүлүкэ күнүнэн Үөһээ Бүлүү баһылыгын аатыттан итиитик-истиҥник эҕэрдэлиибин. Быйыл Исидор Бараховпыт төрөөбүтэ 120 сылыгар аналлаах тэрээһиннэр өрөспүүбүлүкэ уонна улууспут үрдүнэн былааннаахтык ыытылла тураллар. Бу барыта өрөспүүбүлүкэ 100 сааһын туолар үбүлүөйдээх тэрээһиҥҥэ анаан ыытыллаллар. 96 сыл анараа өттүгэр тэриллибит өрөспүүбүлүкэ билигин атын сайдыылаах дойдулары кытта тэҥ кэккэҕэ турар. Маны ситиһэргэ сүрүн акылааты түһэрбит дьонунан Исидор Барахов, Максим Аммосов, Платон Ойуунускай, Степан Аржаков буолаллар. 30-чалаах эрэ эдэр дьон түмсэн, дойдулара инники сайдыытын түстээбиттэрэ элбэҕи туоһулуур. Бу буолар дохсун санаалаах эдэр дьон олоҕу хамсатааччылар буолалларын туоһулуур. Исидор Бараховчугас доҕоро Максим Аммосов төрөөбүт дойдутуттан соторутааҕыта аҕай Нам улууһун баһылыгынан үлэлиир олорбут Александр Атласов билигин тыа хаһаайыстыбатын миниистиринэн ананан дэлэгээссийэ састаабыгар киирэн, бу Үөһээ Бүлүүгэ кэлэ сылдьара туспа символическай суолталаах. Өссө төгүл барыгытын Өрөспүүбүлүкэ күнүнэн эҕэрдэлиибин«, – диэн эттэ.
Үөһээ Бүлүү улууһун ыччатын аатыттан Тихон Егоров эҕэрдэ тылы эттэ. Кини чуолаан, билиҥҥи эдэр ыччат саха чулуу уолаттарын сыдьааннара буолалларын этэн туран, кинилэр олоххо киллэрбит дьыалаларын салгыы өссө сайыннаран, Арассыыйа, Саха сирэ сайдарын туһугар үлэлиэхтээхтэрин туһаайан эттэ. Саха норуотун уһулуччулаах уолаттара төрөөбүт дойдулара бары өттүнэн сайдарыгар кытаанах, халбаҥнаабат бөҕө акылааты түһэрбиттэрэ. Саха сирин саргыта сайдарын туһугар анаабыт хорсун быһыыларын, бэлитиичэскэй дьулуурдарын, дьиҥнээх патриоттуу дьаһалларын саха норуота үйэлэргэ умнубат, киэн туттар, сүгүрүйэр! Уруй-айхал буоллун, Сахабыт сирин судаарыстыбаннаһын олохтообут чулуу дьоммутугар – Исидор Никифорович Бараховка, Максим Кирович Аммосовка, Платон Алексеевич Ойуунускайга, Степан Максимович Аржаковка, Степан Васильевич Васильевка!
Итинник үөрүүлээх тэрээһин кэнниттэн Исидор Барахов аатынан мусуойга улуус, экэниэмикэҕэ сыһыаннаах тэрилтэлэр салайааччылара, нэһилиэк баһылыктара уонна ыччат дьон «Үөһээ Бүлүү улууһун 2030 сылга диэри социальнай-экэнэмиичэскэй сайдыытын тосхоло» диэн «төгүрүк остуолга» кытыннылар. Былаан быһыытынан, бу тосхол 2019 сылга бэлэм буолуохтаах. Мунньахха тэрилтэ салайааччылара бэйэлэрин салааларыгар, хайысхаларыгар тосхолго этиилэрин киллэрдилэр.
Александр ТАРАСОВ, Үөһээ Бүлүү, edersaas.ru сайтка анаан