Оскуола оҕолоро ыраахтан олорон (дистанционно) үөрэнэллэригэр анаан, Саха сиригэр бастакынан Дьокуускай куорат үөрэнээччилэригэр 504 планшеты атыылаһан түҥэппитэ. Аҕыйах хонуктааҕыта улуустартан бастакынан Үөһээ Бүлүү 270 ноутбугу атыыласпыта. Оттон бу күннэргэ “Эргэ көмпүүтэри туттар” диэн аахсыйаны биллэрдэ.
Үөһээ Бүлүү улууһун үөрэххэ управлениетын начаалынньыга Спиридон Борбуев: “Күн бүгүн улууска 3305 оҕо үөрэнэр. 926 оҕо букатын көмпүүтэрэ суох (итинтэн 9-11-с кылаас үөрэнээччитэ — 138). Онон улуус дьаһалтата үбүлээһин көрөн, элбэх оҕолоох, кыаммат ыал оҕолоро ыраахтан олорон (дистанционно) үөрэнэллэрин хааччыйарга анаан, Москваттан 270 ноутбугу атыыластыбыт. Бу ноутбуктары эксээмэннээх 11-с уонна 9-с кылааска үөрэнэр элбэх оҕолоох ыал оҕолоро туһаныахтара. Хаалбыт планшеттары биирдиилээн биридимиэти умсугутан үөрэтэр, чинчийиинэн дьарыктанар оҕолорго биэриэхпит. Бу барыта уларсык бэриллэр, үөрэх саҕаланнаҕына оскуолаҕа туһаныахтара”, — диэн эттэ.
Аҕыйах хонуктааҕыта Ил Түмэн дьокутаата Феодосия Габышева “Помоги учиться дома” диэн Бүтүн Арассыыйатааҕы аахсыйаҕа кыттыһан, икки дьиэ кэргэҥҥэ оҕолоро үөрэнэллэригэр анаан планшеттары бэлэхтээбитэ.
Төһө даҕаны көмө оҥоһуллубутун иһин, бүтүн улуус элбэх оҕолоох, кыаммат ыалын оҕотун барытын көмпүүтэринэн хааччыйар кыаллыбат. Онон үөрэх хаачыстыбатын туһугар Үөһээ Бүлүү улууһун “Оҕо технопаарката” эбии үөрэхтээһин тэрилтэтэ өрөспүүбүлүкэҕэ эмиэ бастакынан “Эргэ көмпүүтэри туттар” диэн аахсыйаны биллэрдэ. Чахчы, кимнээххэ эрэ туһаныллыбакка быыл буола сытар көмпүүтэр элбэх буолуохтаах. Таах сытыаҕынааҕар оҕо үөрэнэригэр туһалаабыта сүүс төгүл ордук.
Олохтоохтор эргэ көмпүүтэрдэрин улуустааҕы үөрэх управлениетыгар илдьэн туттараллар эбит. Начаалынньык Спиридон Борбуев иһитиннэрбитинэн, бүгүҥҥү күҥҥэ номнуо 2 көмпүүтэр, 2 ноутбук, 3 планшет нэһилиэнньэттэн киирбит. “Оҕо технопааркатын робототехникаҕа, графикаҕа учууталлара киирбит тиэхиньикэни барытын саҥаттан таҥан, үөрэх бырагыраамаларын кыайар, интэриниэккэ киирэр гына оҥоруохтара”, — диэн кэпсиир.
https://www.instagram.com/p/B_boLVkA2D1/?igshid=1sph9jurdg3iy
Атын улуустар үөһээ бүлүүлэр үтүө холобурдарын батыһыахтарын, оҕолор дьиэлэриттэн олорон туох даҕаны кыһалҕата суох үөрэнэллэрин хааччыйыахтарын сөп. Инники кэскил туһугар угуллар үп тугунан даҕаны сыаналаммат диэн мээнэҕэ этиллибэт.
Людмила ПОПОВА, edersaas.ru