2017 сыл түмүгүнэн, Үөһээ Бүлүү сэлиэнньэтин баһылыга Максим Силигиянов төрөөбүт-үөскээбит төрүт сэлиэнньэбит чэчирии сайдарын туһугар үлэлии, айа-тута сылдьар бастыҥтан бастыҥ үлэһит дьонун ааттыыр, бар дьонугар махтанар үгэскэ кубулуйбут тэрээһинэ хаһааҥҥытааҕар да чаҕылхайдык буолан ааста.
edersaas.ru
Үөрүүлээх түгэҥҥэ ыраахтан-чугастан ыҥырыллан кэлбит ытык-мааны ыалдьыттар, элбэҕи эрэннэрэр ыччаттарбыт, дьоһун-мааны үлэһит, ытык дьоммут кыттыыны ыллылар.
Ааспыт сыл түмүгүнэн, сэлиэнньэ тупсаҕай көстүүлээх буоларыгар саҥа 2018 сылы көрсө үөрэх тэрилтэлэригэр, чааһынай маҕаһыыннарга, тэрилтэргэ, дьиэ кэргэттэргэ, түөлбэлэр икки ардыларыгар «Саҥа дьыллааҕы бастыҥ киэргэтии» күрэх биллэриллибитэ. Ол түмүгүнэн, «Бастыҥ киэргэтиилээх тэлгэһэ» анал аат хаһаайыттарынан Людмила, Вячеслав Сидоровтар дьиэ кэргэттэрэ ааттаннылар. «Саҥа дьыллааҕы Тымныы оҕонньор уонна Хаарчаана» оҥоһук кыайыылаахтарынан Лидия, Анатолий Лыткиннар, «2018 сыл бастыҥ бэлиэтэ» кыайыылаахтарынан Любовь, Иван Семеновтар буоллулар. Түөлбэлэр икки ардыларыгар хаар, муус оҥоһукка күрэх түмүгүнэн, дьон сэҥээриитин «Хатыҥнаах» түөлбэ ылла. Ураты, аныгылыы истииллээх киэргэтиилээх түөлбэнэн «Кэлтэгэй» түөлбэ, оттон «Саҥа дьыллааҕы бастыҥ киэргэтиилээх» түөлбэнэн «1-кы Билиилээх» түөлбэ ааттанна.
Маҕаһыыннар уонна чааһынай тэрилтэлэр икки ардыларыгар күрэх түмүгүнэн, «Бастыҥ, ураты киэргэтиилээх» «Про-фото» буолла, «Бастыҥ киэргэтиилээх маҕаһыын» үрдүк аатын «Берег» маҕаһыын ылла.
Үөрэх салаатын тэрилтэлэрин икки ардыларыгар «Саҥа дьыллааҕы Тымныы оҕонньор уонна Хаарчаана» оҥоһукка «Теремок», «Бастыҥ киэргэтиилээх тэлгэһэнэн» «Ньургуһун» оҕо уһуйаана ааттанна.
Үөрэх салаатын тэрилтэлэригэр «Бастыҥ киэргэтиилээх тэлгэһэ» 2-с №-дээх М.Т. Егоров аатынан орто оскуола, «Муус оҥоһугунан киэргэтии» кыайыылаахтарынан 1 №-дээх И.Н.Барахов аатынан орто оскуола кэлэктиибэ буоллулар.
Тэрилтэлэр икки ардыларыгар ыытыллыбыт күрэх түмүгүнэн, «Муус оҥоһуктаах бастыҥ тэрилтэ» «Сахатранснефтегаз» Үөһээ Бүлүүтэҕи филиала, «2018 сыл бастыҥ бэлиэтэ» 12-с №-дээх баһаарнай чаас, «Саҥа дьыллааҕы бастыҥ киэргэтии» олох-дьаһах хомунаалынай хаһаайыстыба кэлэктииптэрэ тигистилэр.
Бу кэннэ 2017 сыл түмүгүнэн, сэлиэнньэ социальнай-култуурунай олоҕор киллэрбит кылааттарын иһин түөскэ ааньынар анал бэлиэлэри СӨ Ил Дархана 2017 сыл ахсынньы 30 күнүнээҕи уурааҕынан СӨ үбүлүөйүнэй бэлиэнэн педагогическай үлэ бэтэрээнэ, педагогическай наука кандидата, СӨ үөрэҕириитин туйгуна, Үөһээ Бүлүү сэлиэнньэтин, улууһун бочуоттаах олохтооҕо «Верхневилюйские славянки» кинигэ ааптара Мария Михайлова, «Дьулуур» уопсастыбаннай түмсүү салайааччыта Зоя Егорова, «Айылгы» уопсастыбаннай түмсүү кыттыылааҕа Людмила Егорова наҕараадаланнылар.
Үөһээ Бүлүү сэлиэнньэтин дьокутааттарын сэбиэтин мунньаҕын быһаарыытынан, «Үөһээ Бүлүү сэлиэнньэтин бочуоттаах олохтооҕо» үрдүк аат «Олох-дьаһах, хомунаалынай хаһаайыстыба Үөһээ Бүлүүтээҕи филиалын» автотранспортнай хаһаайыстыбатын начаалынньыгар, СӨ хомунаалынай хаһаайыстыбатын бочуоттаах үлэһитигэр Михаил Андреевка, Арассыыйа бочуоттаах донорыгар, СӨ үп-харчы үлэтин туйгунугар Галина Семеноваҕа, Быракаан, Үөдүгэй нэһилиэктэрин бочуоттаах олохтооҕор Людмила Петроваҕа, үрдүкү категориялаах дизайнер учууталыгар Розалия Бурнашеваҕа туттардылар.
Биһиги улууспутугар ааспыт сыл үгүс тэрээһиннэрдээх, үтүмэн үөрүүлээх ураты сылынан буолан, үйэ сааска сүрэхпитигэр хаалла… 2017 сыл түмүгүнэн, бастыҥ үлэлээх, көрдөрүүлээх дьон анал ааттары туттулар.
Ол курдук, «Бастыҥ эдэр ыччат» өрөспүүбүлүкэ, улуус эдэр кэскиллээх оһуохайдьыта, өбүгэ үгэһин тарҕатааччы, сэлиэнньэ хапсаҕайдаһан тустууга сүүмэрдэммит хамаандатын чилиэнэ, «Тускул» оҕо киинин дириэктэрэ Андрей Алексеев, «Бастыҥ спортсмен» ХХ-с үбүлүөйдээх Манчаары оонньууларын хапсаҕайдаһан тустууга муҥутуур кыайыылааҕа, СӨ хапсаҕайдаһан тустууга спорт маастара Увар Тимофеев, «Доруобуйа харыстабылын эйгэтин бастыҥ үлэһитэ» улуустааҕы киин балыыһа терапевт бырааһа Саргылана Герасимова, «Үөрэҕирии эйгэтин бастыҥ үлэһитэ» Д.С.Спиридонов аатынан 4-с №-дээх орто оскуолатын алын сүһүөх кылаастарын учуутала Надежда Архипова, “Бастыҥ урбаанньыт” полиграфическай өҥөнү оҥоруу киин салайааччыта Александр Антонов, “Култуура бастыҥ үлэһитэ” култуура уонна духуобунай сайдыы Департаменын сүрүннүүр исписэлииһэ Индира Федорова, “Оҕо уһуйаанын бастыҥ иитээччитэ” “Теремок” уһуйаанын иитээччитэ Вера Макарова, “Бастыҥ үлэлээх түөлбэ” 1-кы Билиилээх түөлбэ (салайааччы Наталья Васильева), “Айылҕа харыстабылын бастыҥ үлэһитэ” Александр Архипов, “Маассабай иһитиннэрии бастыҥ үлэһитэ” “Үөһээ Бүлүү” хаһыат кэрэспэндьиэнэ Валентина Догоюсова, “Бэрээдэги харыстааһын эйгэтин бастыҥ үлэһитэ” полиция отделын участковай боломуочунайын көмөлөһөөччүтэ Петр Павлов, «Олох-дьаһах, хомунаалынай хаһаайыстыба бастыҥ үлэһитэ” ОдьКХ Үөһээ Бүлүүтээҕи филиал киин учаастагын силиэссэрэ Артемий Руфов, “Бастыҥ салайааччы” олох-дьаһах, хомунаалынай хаһаайыстыба тэрилтэтин салайааччыта Василий Николашкин буоллулар. Оттон “Сыл бастыҥ ытык ыала» анал аат Раиса Степановна, Василий Степанович Тимофеевтар дьиэ кэргэттэригэр тиксэн, үөрүүбүт үс бүк үрдээтэ.
Кыайыылаахтары кырачаан Күннэй Капитонова, биир дойдулаахтарбыт Юрий Гольдеров, Дмитрий Дьячковскай, Владимир Васильев, маны сэргэ, Дьокуускай куораттан “Гулун” үҥкүү ансаамбыллара эҕэрдэлээн, үөрүүлээх түгэни эбии киэргэттилэр.
“Үөһээ Бүлүүбүтүн Сахабыт сиригэр эрэ буолбакка, өссө аан дойдуга тиийэ ааттатаргытыттан киэн туттабыт! 2017 сыл хас биирдии киһиэхэ умнуллубат чыпчааллары үйэ-саас тухары хаалларда. Хас биирдиибит сэмэй кылааты киллэристэ. Бу тэтиммитин ыһыктыбакка, кэлэр сылларга эбии өрөйөн-чөрөйөн сомоҕолоһуохха!”, – диэн баһылык Максим Силигиянов дорҕоонноох этиитинэн бастыҥ түһүлгэ түмүктэннэ.
Валентина ДОГОЮСОВА, Үөһээ Бүлүү, edersaas.ru сайтка анаан