Маны аах

Үөһээ бүлүүлэр алаадьынан айах тутан көрсөллөр

Суруналыыстар бөлөхтөрө Үөһээ Бүлүү улууһун кыраныыссатыгар кэллибит.  Үөһээ Бүлүү кыраныыссатыгар Олоҥхо ыһыаҕын ыалдьыттарын арыылаах алаадьынан маанылаан, күндүлүү көрсөллөр. Түптэ буруота унаарыйан, бырдахтары үргүтэр, оҕо сааһы санатар. Ырыа-тойук дьиэрэйэр.

Бу маннык мааны көрсүүттэн ыалдьыттар үтүө дойдуга кэлбиттэрин, кинилэри кэтэспиттэрин, тута билэллэр, сүргэлэрэ көтөҕүллэр. Сахалыы таҥастаах кыргыттар, дьахталлар солбуһа сылдьан, сарсыардаттан киэһэ 12 чааска диэри ыалдьыттары көрсөллөр.

Анаан хаартыскаҕа түһэр сири — олоҥхо боотурун кытары айыы хотунун уонна быйылгы ыһыах Аал Луук маһын үтүгүннэрэн оҥорбуттара олус сэргэх. Төһө да уһун айантан сылайдаллар, дьон үөрэ-көтө хаартыскаҕа түһэллэр, бу түгэннэрин үйэтитэллэр.

Дьокуускайтан Үөһээ Бүлүүгэ диэри суол кураанах, сорох сиринэн аспаала суох буолан, быыллаах, нэксиэлээх.  Бүгүн сүрүннээн биирдиилээн ыал  бэйэлэрин массыыналарынан баран эрэллэр. Онон «чайнойдарга»  улахан уочарат суох курдук. Ол эрээри, сарсын дэлэгээссийэлэр айаннаатахтарына уочарат элбииһи. Астара  минньигэс, сыаната удамыр.

 

Ангелина Васильева, Елена Потоцкая, edersaas.ru

1
0
Telegram @edersaas20