Үөһээ Бүлүү, Хаҥалас, Дьокуускай, Чурапчы хамаандаларыгар бастакы кыһыл көмүс мэтээллэри быһыйдар аҕаллылар
Быһыйдар сырсыыларыгар хаҥаластар икки кыһыл көмүс мэтээллэннилэр. Елена Мутовина кыргыттар үс биэрэстэҕэ сырсыыларыгар кыайыылааҕынан тахсан, үбүлүөйдээх Манчаары Оонньууларын бастакы чөмпүйүөнүнэн буолар чиэстэннэ.
Уолаттар биэс тыһыынча миэтэрэҕэ сүүрүүлэригэр Хаҥалас өссө биир быһыйа Николай Копырин (15.50.50) хамаандатыгар иккис кыһыл көмүс мэтээли аҕалла. Константин Драгунов (Чурапчы, 16.43.31) — иккис, Николай Калачиков (16.43.81) үһүс буоллулар.
Дьахталлар биэс биэрэстэҕэ күрэс былдьаһыыларыгар үөһээ-бүлүүлэр эрэллэрэ Сардаана Трофимова (15.48.24) сүрүн күрэстэһээччитин Наталья Леонтьеваны (Сунтаар, 16.03.35) алта уонча миэтэрэнэн куотан кэллэ. Мэҥэ Хаҥаластан Наталья Сотникова (17.27.99) үһүс бириистээх миэстэҕэ таҕыста.
Эр дьон биир көскө куоталаһыыларыгар Дмитрий Степанов (Чурапчы, 32.07.82) тэҥнээҕин булбата. Хаҥаластан Вячеслав Громов (32.54.42) иккис буолла. Намтан Роман Алексеев (33.13.91) үһүс көрдөрүүлэннэ.
Уолаттар сүүс миэтэрэҕэ сырсыыларыгар Үөһээ Бүлүү быһыйа Николай Руфов биэтэккэ бастакынан кэлэн дьонун-сэргэтин үөртэ. Көрдөрүүтэ — 11.10 сөкүүндэ. Ленскэйтэн Юрий Саенко (11.28) — иккис, Чурапчыттан Борис Строев (11.33) үһүс миэстэлэри ыллылар.
Кыргыттарга Исмира Шабиева (Дьокуускай) кими да атахтаах оҥорбото. Көрдөрүүтэ — 12.61 сөкүүндэ. Ленскэйтэн Елена Закирко иккиһинэн тэбэн кэллэ — 12.98 сөкүүндэ. Юлия Горбунова (Дьокуускай, 13.17) үһүс буолла.
Сарсын, от ыйын 8 күнүгэр, дьахталлар — үс, эр дьон — биэс биэрэстэҕэ ким түргэнин быһаарсыахтара. Эр дьон, дьахталлар 100 миэтэрэҕэ илин-кэлин түсүһүөхтэрэ.
Роман ПОПОВ, «Саха сирэ» хаһыат, edersaas.ru
Ааптар хаартыскаҕа түһэриилэрэ.