Бүгүн Үөһээ Бүлүүгэ улуустааҕы култуура дьиэтигэр урбаанньыттар форумнара үрдүк таһымнаахтык буолан ааста.
Биллэрин курдук, быйыл сайын улууска өрөспүүбүлүкэбит тэриллибитэ 100 сылыгар аналлаах Олоҥхо ыһыаҕа ыытыллыаҕа. Онон сибээстээн, улуус урбаанньыттарын түмэр сыаллаах тэрээһин буолла.
Форум туһунан улууска биллэр-көстөр урбаанньыт Марфа Еттяноваттан ыйыталаспыппытыгар: “Тэрээһин үрдүк таһымнаахтык ааста. Сүрүн тиэмэтэ – бу сайын ыытыллыахтаах Олоҥхо ыһыаҕар бэлэмнии. Ыһыах кэмигэр хайдах-туох үлэлиирбитигэр сүбэ-ама биэрдилэр. Ааспыт сылга таһаарыылаахтык үлэлээбит урбаанньыттар наҕараадаланнылар. Түгэнинэн туһанан, улууспут дьаһалтатыгар маннык бэртээхэй тэрээһини ыыппытыгар ис сүрэхпиттэн махтанабын”, — диэн санаатын үллэһиннэ.
Ону тэҥэ, култуура дьиэтин тэлгэһэтигэр тыа хаһаайыстыбатын бородууксуйатын уонна норуот уус-уран оҥоһуктарыгар быыстапка-дьаарбаҥка ыытылынна. Ньурбаттан «Күндээдэ» кэпэрэтиип уонна «Үөһээ Бүлүү» ХЭУо үрүҥ илгэттэн оҥорбут бородууксуйаларын атыылаатылар.