Бэҕэһээ, Үөһээ Бүлүүгэ үөрэх управлениетын көҕүлээһининэн, «Партнерство семьи и школы: опыт, проблемы, перспективы» диэн төрөппүттэр конференциялара буолла. Улуус 21 нэһилиэгиттэн төрөппүттэр, учууталлар араас хабааннаах анал секцияларга сырыттылар.
edersaas.ru
Конференция пленарнай мунньаҕар СӨ үөрэҕин уонна наукатын миниистирин 1-кы солбуйааччы Феодосия Габышева, Үөһээ Бүлүү улууһун баһылыга Владимир Поскачин кытыннылар.
Сүрүн дакылааты Үөһээ Бүлүү улууһун үөрэххэ управлениетын начаалынньыга Спиридон Борбуев оҥордо. «Үөрэх салалтатын салайааччытынан ананан баран, улуус нэһилиэктэрин барытын кэрийиэхтээхпин, билсиэхтээхпин диэн сорук туруорбутум. 21 нэһилиэги, 3 учаастагы барытын билистим. Кылгастык бүгүҥҥү турукпутун билиһиннэриэм. Биһиги улууска 58 үөрэх тэрилтэтэ баар. Бары кэлэктиип бэркэ тэринэн бэйэлэрин кыахтарынан үлэлии олороллор. Биһиги улууска социальнай эбийиэктэри тутуу күүскэ барар. Ол курдук, бу кэлиҥҥи сылларга Кырыкыйга, Кэнтиккэ Быракааҥҥа оҕо саадтара үлэҕэ киирдилэр. Быйыл Намҥа саҥа таас оскуола тутулунна. Сыл устата Далырга, Өргүөккэ 50-нуу, Үөһээ Бүлүүгэ Билиилээххэ 240, Хомустаахха 20 миэстэлэрдээх оҕо саадтара үлэҕэ киириэхтэрэ. Ботулууга оскуола, Маҥааска оҕо саадын тутуу саҕаланыа. Сатаннаҕына быйылгыттан Хороҕо оҕо саада тутуута эмиэ саҕаланар туруктаах. Үөрэх хаачыстыбата тупсарыгар былаан быһыытынан учууталлар таһымнарын сайыннарыыга күүскэ үлэлээн эрэбит. Нуучча тылын учууталлара бу ый 24 күнүгэр Санкт- Петербурга баран нуучча култууратын, улуу суруйааччылар төрөөбүт-үөскээбит, айбыт-туппут сирдэригэр барыахтара. Муус устарга оскуола завучтара Татарстаҥҥа баран анал куурустарга сылдьыахтара. Инники өттүгэр саха тылын учууталлара саха суруйааччыларын төрөөбүт сирдэринэн уонна Казахстаҥҥа төрүт тылы хайдах үөрэтэллэрин билсэ барыахтара. Оҕолорбут каникул кэмигэр сынньалаҥнарын аттаран туруорар үлэни ыытыахпыт.
Бу сааскы каникулга Хороҕо улуус бары оскуолаларыттан 80 оҕо кэлэн үөрэниэхтэрэ, дьарыктаныахтара. Сайыҥҥы хонуктаах лааҕырдары эһиилгэттэн аһан үлэлэтиэхпит. Биир саамай улахан былааммытынан Кванториуму тутуу буолар. Манна экспериментальнай, лабораторнай анал былаһааккалар оҕону сайыннарыыга анаан үлэлиэхтэрэ», — диэн кэпсээтэ.
Салгыы улуус баһылыга Владимир Поскачин: «Улуус үрдүнэн төрөппүттэргэ аналлаах конференция дьоһуннаахтык буолла. Сөптөөх тэрээһин. Мин санаабар, оскуола уонна төрөппүт кыттыһан, көҥүл санаалаах, тыыннаах дьону иитэн таһаарыахтаахтар. Ол аата кимтэн да тутулуга суох сөптөөх быһаарыныыны ылынар кыахтаах дьону. Маннык киһи олоххо миэстэтин түргэнник уонна бигэтик булар. Олоххо бары өттүнэн бэлэмнээх буолар», — диэн санаатын төрөппүттэргэ туһаайан эттэ.
Салгыы Феодосия Васильевна төрөппүттэргэ анаан: «Урут оҕону үлэнэн үөрэтии күүскэ барара. Ол билигин уларыйан турар. Ол гынан баран, төрөппүт оҕотун үлэҕэ уһуйуохтаах, үөрэтиэхтээх. Үлэ оҕону үөрэтиигэ улахан оруоллааҕын умнуо суохтаахпыт. Иккиһинэн, төрөппүт оҕотуттан кинигэни ааҕыыны ирдиэхтээх. Онуоха төрөппүт холобур буолан, кинигэни хайаан да ааҕыахтаах. Төрөппүт кинигэни тутан көрбөт, аахпат буоллаҕына, оҕо хайдах да аахпат. Билигин кинигэни элбэхтик ааҕан, ону ырытар дьиэ кэргэн аҕыйыы турара олус хомолтолоох»,— диэн эттэ. Салгыы төрөппүттэр, учууталлар санааларын эттилэр.
Учууталлар, төрөппүттэр санаалара
Адам Борисов, Сургуулук нэһилиэгин орто оскуолатын учуутала:
— Биһиги биэс учуутал, алта төрөппүт уонна биир оҕо буолан бу конференцияҕа кытта киирэ сылдьабыт. Маннык тэрээһин көдьүүһэ элбэх. Атын оскуолалар хайдах-туох үлэлии олороллорун билистибит. Аны туран, аҕа статуһун үрдэтиигэ элбэх этиини, санааны иһиттибит. Кистэл буолбатах, төрөппүт мунньаҕар өрүү ийэлэр сылдьаллар. Үгүс аҕа оскуолаҕа адьас сылдьыбат.
Петр Деллохов, төрөппүт, Үөһээ Бүлүү:
— Биир бэйэм бу тэрээһиҥҥэ сылдьан элбэҕи биллим. Эбиэт иннигэр буолбыт анал секцияларга оскуолаҕа төрөппүт оруолун туһунан элбэҕи кэпсэттибит, ырыттыбыт. Төрөппүт оскуоланы кытта бииргэ үлэлиирин күүһүрдэр, саҥалыы тыынныыр туһунан былааны ылынан ону резолюцияҕа киллэрдибит.
Жанна Иванова, төрөппүт, Ороһу нэһилиэгэ:
— Олус интэриэһинэй конференция буолла. Төрөппүт оҕотун уруогун аахтарын хайаан да күүскэ ирдиэхтээҕин тула секцияҕа кэпсэттибит, дьүүллэстибит. Олус сөптөөх санаалары, этиилэри иһиттибит. Төрөппүт быһыытынан оскуоланы, учууталлары кытта хайдах үлэлииргэ элбэх саҥаны иһиттим.
Александр Тарасов, Үөһээ Бүлүү, edersaas.ru