Үөһээ Бүлүүгэ үс киһи ыалдьыбытыттан, биирэ үтүөрэн тахсыбыт
Үөһээ Бүлүүтээҕи киин балыыһа сыстыганнаах ыарыылары эмтиир салаатыгар 10 киһи үлэлиир.
edersaas.ru
Сэбиэдиссэй, инфекционист быраас Ньургуйаана Валерьевна Санникова салалтатынан старшай сиэстэрэ Тимофеева Л.В., сиэстэрэлэр Михайлова С.З., Харабаева А.А., Николаева И.А., санитаркалар Антонова Ф.Б., Полозова Н.В., Гурьева Л.М., Игнатьева В.Н. уонна ас тарҕатааччы Петрова И.А. үтүө суобастаахтык үлэлии сылдьаллар.
СOVID-19 дьаҥа тарҕаммыт кэмигэр ураты кытаанах ирдэбиллээх усулуобуйаҕа эппиэттиирдии балыыһа 3 зонаҕа арахсар: “кыһыл зона” — ыарыһахтар сытар сирдэрэ, саамай кутталлаах зона, “араҕас зона”- үлэһиттэр харыстанар таҥастарын-саптарын кэтэр-устар, дезинфекциялыыр зоналара уонна «күөх зона» — үлэһиттэр сынньанар зоналара, ыраас миэстэ. Дьуһуурустубаҕа сылдьар үлэһит сынньанар, аһыыр кэмҥэ этин бүтүннүү суунан эрэ баран ыраас зонаҕа ааһар. Үлэһиттэр СИЗ-нан (средства индивидуальной защиты) хааччыллыылара үчүгэй. Иккилии комбинезон, биирдии чууму утары көстүүм, ону таһынан сирэйи хаххалыыр дьэҥкир экран, ачыкы, респиратор хас биирдиилэригэр тус тутталларыгар баар. Инфекцияны утары испиирдээх антисептиктары уонна хлор буккаһыктаах дезинфектаннары тутталлар. Билиҥҥи туругунан улуус үрдүнэн 3 киһи ыалдьыбытыттан 1 киһи эмтэнэн үтүөрэн тахсыбыт, 2 киһи эмтэнэ сытар. Үлэһиттэр нэдиэлэ ахсын ковидка анализ туттараллар, ылыллыбыт матырыйаал лабораториянан (сэбиэдиссэй Анна Павловна Львова) куоракка утаарыллар.
Ыалдьыбыт дьону Дьокуускайдааҕы республиканскай клиническэй балыыһаны кытта телемедицина нөҥүө сүбэ-ама ылан, кинилэр ыйыыларынан эмтииллэр Үлэһиттэр дьиэлэриттэн-уоттарыттан тэйэн, анал уопсайга изоляцияланан олороллор. Дьоннорун кытта суотабай сибээһинэн эрэ билсэр-көрсөр кыахтаахтар. Аһылыктара киин балыыһаттан хааччыллар.
Түгэнинэн туһанан, сыстыганнаах ыарыылары эмтиир балыыһа үлэһиттэрэ киин балыыһа салалтатыгар, балыыһа аатыгар бэйэлэрин баҕаларынан көмөлөһө турар үтүө санаалаах бар дьоҥҥо улаханнык махтаналлар. Чэгиэн доруобуйаны, чөл олоҕу баҕараллар.
Үөһээ Бүлүүтээҕи киин балыыһа
@klinikavervil