Үөһээ Бүлүүгэ Өрөспүүбүлүкэ күнүгэр күн сирин көрбүт кырачааннары эҕэрдэлээтилэр

Бүгүн, ыам ыйын 1 күнүгэр, Үөһээ Бүлүүтээҕи төрүүр дьиэттэн муус устар 27 күнүгэр  күн сирин көрбүт икки кырачааны дьиэлэригэр атаарыы үөрүүлээх чааһа буолла.  

Ыаллары улуус баһылыгын бастакы солбуйааччы Семен Михалев, улууска дьиэ кэргэн бэлиитикэтигэр сүрүннүүр исписэлиис Сардана Романова, улуустааҕы социальнай харалта начаалынньыга Лидия Ильина, кылаабынай быраас эбээһинэһин толорооччу Сардана Павлова эҕэрдэлээтилэр, кырачааннарга  доруобуйаны, төрөөбүт дойдуга туһалаах дьон буола улааталларыгар баҕа санаа бастыҥын анаатылар.

Икки ыал — Галина Юрьевна, Иван Семенович  Габышевтар  уонна Ирина Борисовна, Матвей Николаевич Ломпордуровтар Ил Дархан Айсен Сергеевич Николаев аатыттан илии баттааһыннаах Саха автономиятын үбүлүөйдээх сылыгар төрөөбүт оҕо ахсын бэриллэр “Дети столетия” диэн 100 тыһыынча солкуобайдаах сэртипикээти, муус устар  27 күнүгэр төрөөбүт оҕоҕо (Өрөспүүбүлүкэ күнэ) анаммыт үрүҥ көмүс погремушканы, «Ийэ сылынан» ийэлэргэ Үөһээ Бүлүү муниципальнай оройуон аатыттан үрүҥ көмүс кольены бэлэх туттулар.

Үөһээ Бүлүүттэн Ирина Абрахова.