Кулун турар 15-16 күннэригэр Үөһээ Бүлүүгэ Саха сирин профсойуустарын федерациятын бэрэссэдээтэлэ Николай Дегтярев салайааччылаах 19 киһилээх дэлэгээссийэ үлэлээтэ. Ити тэрээһин чэрчитинэн, Үөһээ Бүлүү улууһунааҕы ОДьКХ, медицина, култуура, үөрэх, дьаһалталар профсойуустара “Хаар айан” күрэхтэһиигэ кытыннылар
Александр ТАРАСОВ, «Саха сирэ» хаһыат, https://edersaas.ru
“Хаар айан” күрэхтэһиигэ барыта 12 массыына илин-кэлин түһүстэ. Бэрт тыҥааһыннаах киирсии кэнниттэн бастакы миэстэни дьаһалталар, иккиһи — ОДьКХ уонна үсүһү эмиэ дьаһалталар профсойуустарын суоппардара ыллылар.
Итини тэҥэ, иккис түһүмэҕинэн ыытыллыбыт “Көрдөөх стартар” күрэхтэһиигэ бастакы миэстэ үөрэх үлэһиттэрин, иккис дьаһалталар уонна үһүс ОДьКХ профсойуустара буоллулар. Үһүс түһүмэххэ канаат тардыстылар. Манна бастакы миэстэни — дьаһалталар, иккиһи — ОДьКХ, үсүһү үөрэх үлэһиттэрин профсойуустара ыллылар.
Үс түһүмэх түмүгүнэн бастыҥ аатын дьаһалталар профсойуустара ылыан ылла. Иккис миэстэ — үөрэх үлэһиттэрэ, үһүс ОДьКХ буоллулар.
Леонид Лазарев, Үөһээ Бүлүүтээҕи үөрэх үлэһиттэрин профсойууһун салайааччыта уонна профсойуустар сүрүннүүр сэбиэттэрин бэрэссэдээтэлэ:
— Профсойуустарга анаан ыытыллыбыт “Хаар айан” күрэхтэһии үрдүк таһымнаахтык буолан ааста. Тэрилтэлэртэн суоппардар көхтөөхтүк кыттыбыттарын бэлиэтиэм этэ. Маннык тэрээһин ыытыллара көдьүүһэ элбэх.