Үөһээ Бүлүү улууһун Андреевскай сэлиэнньэтигэр олунньу 10 күнүгэр Ю.Н.Прокопьев аатынан орто оскуола салҕааһынын арыйыы буолла.
Үөрэх министиэристибэтэ иһитиннэрбитинэн, үөрэх тэрилтэтин эбийиэгэ 1344,1 кв.м. иэннээх, 120 үөрэнэр миэстэлээх. Сметата 39 мөл солкуобай кэриҥэ.
Тутууну ыытыы боппуруоһа оскуола дьиэтин аҥаара (спорт саала, бибилэтиэкэ, куукуна, остолобуой, компьютер кылааһа, актовай саала уонна сорох кабинеттар) баһаарга былдьаммытын кэннэ турбута. Оскуола сүрүн дьиэтин туруга үчүгэй, манна 184 оҕо үөрэнэр, ол эрээри миэстэ тиийбэтиттэн икки сменанан үөрэнэллэр. Салҕааһын тутуу бу кыһалҕаны быһаарыаҕа. Манна спорт саалата, актовай саала уонна аһылык блога, бибилэтиэкэ, үөрэнэр кылаастар бааллар.
Санатан эттэххэ, өрөспүүбүлүкэҕэ үөрэх тэрилтэлэригэр иккис сменаны суох оҥорууга тиһиктээх үлэ ыытыллар.
