Ааспыт түүн Үөһээ Бүлүүгэ элбэх кыбартыыралаах дьиэ уокка былдьаммыта. Быһылаан буолбутун Ил Дархан Айсен Николаев истээт да, СӨ премьер-миниистирэ Андрей Тарасенко балаһыанньаны миэстэтигэр тиийэн билсэригэр сорудахтаабыта.
Андрей Тарасенко улуус баһылыга Владимир Поскачины кытта уокка былдьаммыт дьиэ олохтоохторун кытта көрүстэ. Уоттан эмсэҕэлээбиттэргэ сөптөөх мэдиссиинискэй көмө оҥоһуллар. Хомойуох иһин, икки киһи суорума суолланна, үс оҕо балыыһаҕа сытар. Кинилэри бу сарсыарда Дьокуускайтан көтөн тиийбит анал биригээдэ көрөр-истэр.
Билигин баһаар туохтан барбыта уонна кимнээх буруйдаахтара быһаарыллар. Баһаарынайдар кэмигэр кэлэн, сөптөөх дьаһалы ылан, 15 кыбартыыраны өрүһүйбүттэрэ. Барыта 52 киһини уоттан быыһаабыттара, кинилэр ортолоругар 12 оҕо баара.