Үөһээ Бүлүүгэ «Манчаары» дербитэ аан маҥнай оонньонуо

Бөлөххө киир:

«Манчаары оонньуута» буолан баран, ат сүүрдүүтэ суох табыллыбат. Үөһээ Бүлүү Түгэхтэй диэн саҥа ипподромугар улуустартан түөртүү аттаах 10 хамаанда кыттара күүтүллэр. Күрэхтэһии буолуон биир күн иннинэ, ол эбэтэр от ыйын 7 күнүгэр, киэһэ 7 чаастан ипподрому арыйыы сиэрэ-туома ыытыллыа уонна харчылаах сүүрдүү тэриллиэ.


Үөһээ Бүлүү улууһун баһылыгын бастакы солбуйааччы, өрөспүүбүлүкэтээҕи ат спордун федерациятын чилиэнэ Андрей Неустроевтан уонна Тамалакаан нэһилиэгин баһылыга, Үөһээ Бүлүү улууһунааҕы ат спордун федерациятын бэрэссэдээтэлэ Вадим Егоровтан ыйыталаһан билбиппинэн, зачету таһынан 36 ат сүүрүөҕэ. Бириистээх сүүрүүгэ барыларын сүүрдүөхтэрэ суоҕа, иккис күн киэһэтигэр уонча аты хаһааныахтара.

Тэрийээччилэр этэллэринэн, бириис пуондата мөлүйүөн кэриҥэ буолла. Ол курдук, Бүлүү суолун тутар “Сибмостстрой” ХЭУо УАЗ-Хантер массыынаны, Үөһээ Бүлүүгэ “Сова” маҕаһыыннаах предприниматель Сергей Тобохов матассыыкыл туруордулар. “СахаАгроПродукт” өрөспүүбүлүкэтээҕи потребкэпэрэтиип (бырабылыанньа бэрэссэдээтэлэ Константин Тимофеев) 220 тыһ. солк., предприниматель Леонид Корякин 100 тыһ. солк., Ороһу нэһилиэгэр Туочука диэн аатырбыт сүүрүк сылгылаах (Точука уобараһа айан суолун кытыытыгар өйдөбүнньүк буолан турар) аатырбыт ат баайааччы Василий Семенович Борисов оҕолоро, бииргэ төрөөбүттэрэ  80 тыһ. солк. суумалаах харчынан спонсордаатылар итиэннэ  кыайбыт аттаах дьоҥҥо бэйэлэрэ туттарыахтара.

Саха сиригэр төрөөбүт үс саастаах сылгыларга 2400 миэтэрэҕэ сүүрдүүгэ “Дерби-Манчаары” бирииһин биһиги аан маҥнай тэрийэбит. Ону атыттар батыһан салгыыллара буоллар”, — диэн Андрей Иннокентьевич баҕа санаатын быктарда. Тэрийээччилэр чопчу эппэтилэр эрээри, бука, Хантер ити дистанцияҕа ананар буолуохтаах. Ону бүгүн киэһэ илэ көрүөхпүт-билиэхпит.

Олохтоохтор хамаанданан түмүк таһаарар “харахтаах” сүүрдүүгэ үс бастыҥ иһигэр киирэргэ суоттаналлар. Уон хамаанда бары тэҥ баайыылаах буолбатахтар: сорохтор ыстарааптаммат, уон иһигэр киирсэр инниттэн эрэ саха аттаах кэлбиттэр. Ону, этэргэ дылы, биэтэк бэйэтэ көрдөрүө.

Василий НИКИФОРОВ, “Саха сирэ” хаһыат, edersaas.ru

Хаартыска: интэриниэттэн.

+1
0
+1
0
+1
0
+1
0
+1
0
+1
0
+1
0