Доруобуйа Маны аах

Үөһээ Бүлүүгэ КТ-кэбиниэт үлэтин саҕалаата

Кэлиҥҥи кэмҥэ улуустарга компьютернай томография кэбиниэттэрэ аһыллан үлэлээн эрэллэр. Холобур, урукку өттүгэр Бүлүү  бөлөх улуустартан Ньурбаҕа эрэ баар эбит буоллаҕына, билигин Бүлүүгэ, Үөһээ Бүлүүгэ  аһыллан үлэлээн эрэллэр.

Бэҕэһээ Үөһээ Бүлүүтээҕи киин  балыыһаҕа компьютернай томография кэбиниэтэ аһыллан үлэлээтэ.  Улуус  доруобуйатын харыстабылын историятыгар өссө биир улахан хардыы оҥоһулунна. Кэбиниэт үөрүүлээх аһыллыытын аалай лиэнтэтин быһарга улуус дьаһалтата, балыыһа салалтата, эмчиттэр кыттыыны ыллылар. Компьютернай томография доруобуйа харыстабылын үрдүк кыамталаах аныгы аппарааттарыттан биирдэстэрэ буолар. Кэбиниэт  тестовай эрэсииминэн үлэлээн,  номнуо 700-тэн тахса чинчийиини  оҥорбут.

Быйыл от ыйын 15 күнүттэн туох баар ирдэбилгэ эппиэттиирдии бэлэм буолан,   анал лиссиэнсийэни  ааһан, былааннаах чинчийиитин саҕалаата.  Сэбиэдиссэй рентгенолог-быраас Карина Никифорова, ренгент-лаборант Мария Иванова анал үөрэҕи ааһан, бары инструкцияны тутуһан үлэлииллэр.  Томограф оройуон олохтоохторун уһун кэмнээх баҕа санааларын учуоттаан, улуус дьаһалтатын быһаччы туруорсуутунан өрөспүүбүлүкэ  бүддьүөтүттэн үбүлэнэн ситиһилиннэ.

Мантан антах дьон ыраах айаннаабакка, улуус киинигэр көрдөрүнэн, ыарыыны түргэнник чопчу быһааттарар кыахтаннылар. Оччотугар эмтэниитэ уталытыллыбакка саҕаланар буолуоҕа. Ити ыарыһахха да, эмчиккэ да улахан көмө. Диагностика аныгы ньымалара өрөспүүбүлүкэ бөдөҥ балыыһаларыгар эрэ буолбакка, оройуон балыыһаларыгар  киирэллэр махталлаах дьыала. Ыарыһаҕы компьютернай томографка чинчийии быраас анааһынынан буолуоҕа. Күҥҥэ 7-8 чинчийии былаан быһыытынан ыытыахтара.

Үөһээ Бүлүүтээҕи киин балыыһа пресс-сулууспатын матырыйаалынан.

0
0