Үөһээ Бүлүүгэ халаан уутуттан харыстыыр тутууну федеральнай бүддьүөт уйунуоҕа
СӨ Ил Дархана Айсен Николаев Уһук Илин уокурук Сэбиэтин ааспыт сугулаанын кэнниттэн өрөспүүбүлүкэ федеральнай бүддьүөттэн үбүлэнэн Бүлүү өрүскэ халаан уутуттан харыстыыр тутуу Үөһээ Бүлүү нэһилиэгэр тутулларын сырдатта.
«Бу эбийиэк тутуутун туһунан боппуруос уруккуттан баар — 2015 сылтан, ол эрээри эрдэ федеральнай үптэн өйөбүл суоҕа. Билигин бу тутууга кэлэр сылтан 700 мөлүйүөн солкуобай үс сыл кэриҥэ көрүллэрин туһунан быһаарыы ылылынна», — диэн Айсен Николаев айылҕа ресурсатын уонна экология министиэристибэтигэр, ону сэргэ РФ Бэрэсидьиэнин Уһук Илиҥҥэ боломуочуйалаах бэрэстэбиитэлигэр Юрий Трутневка бу бырайыагы өйөөбүтүгэр махтанна.
Үөһээ Бүлүүгэ биэрэктэри бөҕөргөтөр тутуу уопсай сууммата 798 мөлүйүөн 583 тыһыынчаҕа тэҥнэһэр.
Ульяна ЗАХАРОВА.