Үөһээ Бүлүүгэ хаарбахтан саҥаҕа көһөрүү бырагырааматынан элбэх кыбартыыралаах саҥа дьиэ тутуллан үлэҕэ киллэрилиннэ.
Үөрүүлээх бэлиэ түгэҥҥэ бүгүн, тохсунньу 22 күнүгэр, саҥа дьиэ хаһаайыттарыгар күлүүстэр туттарылыннылар. Сабыс-саҥа дьиэҕэ 28 ыал көстө. Кинилэр бу иннинэ Исидор Барахов уулуссатыгар хаарбах туруктаах дьиэҕэ олорбуттара.
Долгутуулаах бэлиэ түгэҥҥэ күлүүстэри дохсун ытыс тыаһыгар доҕуһуоллатан Ил Дархан Айсен Николаев туттарда. Манна даҕатан эттэххэ, кини бүгүн төрөөбүт күнүгэр үлэтинэн Үөһээ Бүлүүгэ тиийэн сылдьар.
«Дойду Бэрэсидьиэнэ Владимир Путин көҕүлээбит «Олорор дьиэ уонна куорат эйгэтэ» национальнай бырайыага инники күөҥҥэ тутуллар. Бу бырайыак мөлүйүөнүнэн киһи олорор усулуобуйатын тупсарарыгар дьиҥ кыаҕы биэрэр. Биһиги өрөспүүбүлүкэбитигэр бырагырааманан мөлүйүөнтэн тахса кв.м. иэннээх сиртэн көһөрүү былааннанар. Мин маннык далааһыннаах үлэҕэ Үөһээ Бүлүү олохтоохторо эмиэ кыттар кыахтаммыттарыттан долгуйа үөрэбин«, — диэтэ Ил Дархан.
Үс мэндиэмэннээх 1700 кв.м. иэннээх дьиэ «Олорор дьиэ уонна куорат эйгэтэ» национальнай бырайыагынан, «2019-2025 сылларга гражданнары хаарбах туруктаах дьиэттэн көһөрүү» өрөспүүбүлүкэтээҕи аадырыстаах бырагырааманан тутуллубут. Дьэндэйбит саҥа, сырдык дьиэ биирдии уонна үстүү хостоох кыбартыыралардаах. Генеральнай бэдэрээтчит «Стройинжиниринг» хампаанньа.
Саҥа дьиэ хаһаайыттарын ааттарыттан өрөспүүбүлүкэ салалтатыгар Светлана Васильева махтал тылларын эттэ.
«Бүгүҥ биһиэхэ улахан үөрүүлээх бырааһынньык, олус долгутуулаах күн. Наһаа бэртээхэй, кырасыабай, аныгы дьиэ тутулунна. Маннык тупсаҕай, мааны дьиэ олорорго сылаас буоларыгар эрэнэбит«, — диэтэ кини.
Улуус баһылыга Владимир Поскачин аадырыстаах бырагырааманы олоххо киллэрэргэ өйөбүллэрин иһин өрөспүүбүлүкэ салалтатыгар махтанна. Кини оройуоҥҥа хаарбахтан саҥаҕа көһөрүү бырагырааматыгар, иккис түһүмэххэ, уопсай иэн 27 тыһ. кв. м. кэриҥэ буоларын эттэ. Итинтэн бүгүҥҥү күн туругунан 4,5 тыһ. кв.м. кэриҥэ иэннээх сиргэ үлэ толоруллубут. 2022 сылга 7 тыһ. кв.м. иэннээх сиртэн көһөрүү былааннанар.
Санатар буоллахха, «Олорор дьиэ уонна куорат эйгэтэ» национальнай бырайыагынан хаарбахтан саҥаҕа көһөрүү бырагырааматынан, Саха сиригэр 2021 сылга 326 тыһ.км.м. кэриҥэ иэннээх хаарбах туруктаах дьиэттэн 18 тыһ.тахса киһи көһөрүллүбүт. 2022 сылга 25 тыһ. тахса киһини көһөрүү былааннанар.
Андрей Сорокин (СИА) хаартыскаҕа түһэриилэрэ
+1
+1
+1
+1
+1
+1
+1