Өрөспүүбүлүкэ үрдүнэн оскуола үөрэнээччилэригэр сааскы сынньалаҥ буола турар. Үөһээ Бүлүүгэ кулун тутар 26-30 күннэригэр улуустааҕы үөрэх управлениетын көҕүлээһининэн, Хоро оскуолатын баазатыгар «Дабайыы» диэн сааскы лааҕыр үлэлиир.
edersaas.ru
Манна улуус 21 нэһилиэгиттэн 97 үөрэнээччи кэлэн, араас хабааннаах куруһуоктарга үөрэнэллэр. Хоро оскуолатын дириэктэрэ Розалия Самсонова: «Эбиэт иннинэ оҕолор БКЭ-ҕэ бэлэмнэнэн математика, нуучча, биология, обществознание предметтэригэр үөрэнэллэр. Эбиэт кэннэ араас хабааннаах куруһуоктарга, психологическэй трениннэргэ сылдьаллар, улуус тэрилтэлэрин салайааччыларын кытта атах тэпсэн олорон араас тиэмэҕэ сэһэргэһэллэр.
Нэһилиэктэртэн кэлбит оҕолор бары интэринээккэ олороллор«, — диэн кэпсээтэ.
Үөрэнээччилэр санаалара
Александра Николаева, Маҥаас орто оскуолатын 9 кылааһын үөрэнээччитэ:
— Олус үчүгэй тэрээһин буола турар. Үөрэхпэр элбэҕи эбинним. Араас хабааннаах интэриэһинэй куруһуоктарга сырыттым. Күнэ арыый уһун эбитэ буоллар.
Радомир Николаев, Харбалаах оскуолатын 9-с кылааһын үөрэнээччитэ:
— Үөрэхпэр үчүгэйбин. Бу тэрээһиҥҥэ сылдьан элбэҕи биллим. Бэйэм саастыылаахпын кытта билистим. Билиҥҥи санаабынан борокуруор буолуохпун баҕарабын. Бу тэрээһинтэн юридическэй боппуруостарга элбэҕи биллим.
Дьулус Афанасьев, Ороһу оскуолатын 11 кылаас үөрэнээччитэ:
— Элбэх оҕону кытта билистим. Бэйэ санаатын аһаҕастык, толлубакка этэргэ үөрэнним. Быйыл оскуоланы бүтэрэбин, техническэй идэни таллым, промышленноска үлэлиир баҕалаахпын.
Александр Тарасов, Үөһээ Бүлүү, edersaas.ru