Үөһээ Бүлүү улууһугар коронавирус тарҕаныытын сэрэтэр улуустааҕы штаб иһитиннэриитэ.
Үөһээ Бүлүү улууһугар ыам ыйын 16 күнүгэр, 1 киһиэхэ коронавирус диагноһа туруоруллан, чугастык алтыспыт 17 киһи обсерваторга киллэриллибиттэрэ, 22 киһи бэйэни хааччаахтаан олоруу режимигэр дьиэлэригэр олороллор. Куоракка ыытыллыбыт 54 анаалыстан, бүгүн 33 анаалыс ыарыы суох диэн көрдөрбүт. Хаалбыт анаалыстар түмүктэрэ бу күннэргэ биллиэхтээхтэр.
Хомойуох иһин, бүгүн, ыам ыйын 21 күнүгэр, эбии 1 киһиэхэ, Үөһээ Бүлүү бөһүөлэгин олохтооҕор, бочуоттаах сынньалаҥҥа олорор эр киһи анаалыһыгар коронавирус ыарыыта баар диэн бигэргэннэ. Ыарыыга хаптарбыт эр киһи ыам ыйын 7 күнүгэр Дьокуускай куоракка бэйэтин массыынатынан баран кэлбит. Нэдиэлэ буолан баран, кыраадыһа тахсар буолан, доруобуйатын туруга мөлтөөн, быраастарга биллэрбитин, анаалыһын куоракка ылан ыыппыттарын түмүгэр, бүгүн коронавирус ыарыыта баар диэн көрдөрбүт. Сотору кэминэн кэргэнин доруобуйатын туруга эмиэ мөлтөөн, иккиэн билигин быраастар кэтэбиллэригэр бааллар. Билигин алтыспыт дьоннорун быһаарар үлэ бара турар.
Онон, күндү биир дойдулаахтарбыт! Өссө төгүл эһигини харыстаан туран, тоһоҕолоон туран этэбит: дьиэҕитигэр олоруҥ, барыыны-кэлиини тохтотуҥ, атын сиртэн дьону ыҥырымаҥ! Эппиэтинэстээхтик сыһыаннаһыҥ, улахан кыһалҕата суох дьиэҕититтэн тахсымаҥ! Бэйэ бэйэҕитин харыстаһыҥ! Ыарыы биһигини хаарыйыа суоҕа диэбит санааҕытыгар, дьалаҕайдык сыһыаннаһымаҥ! Аһы-үөлү дьиэҕитигэр тиэрдэн биэрэр өҥөнөн туһаныҥ!
Эпидемиологическай балаһыанньа тыҥаан турар кэмигэр, дьиэҕэ олорор эрэсиими кытаанахтык тутуһуҥ диэн ыҥырабыт.
Ыарыыга хаһан баҕарар, ханна баҕарар хаптарыахха сөп, вирус куттала өссө да баар, бу хас биирдиибитин таарыйыан сөп. Барыбытыттан эппиэтинэстээх буолуу, биир өйгө-санааҕа түмсүүлээх буолуу ирдэнэр.