Ил Дархан Айсен Николаев бэҕэһээ, бүгүн Бүлүү бөлөх улуустарга үлэлиир. Бэҕэһээ, атырдьах ыйын 30 күнүгэр, Үөһээ Бүлүүгэ өрүс биэрэгин бөҕөргөтүү үлэтин кытта билистэ.
Ол курдук, бүгүҥҥү күҥҥэ 2,8 км уһуннаах учаастакка 800 м-гэр кумахтаах-гравий кутуллубут. Быйыл саҕаламмыт үлэ 2024 сылга диэри үмүрүтүллүөҕэ. Биэрэк түргэнник сиҥнэр зонатыгар 10-тан тахса дьиэ уонна хас даҕаны социальнай эбийиэктэр хабыллаллара.
«Үөһээ Бүлүүгэ өрүс биэрэгэ кэлиҥҥи сылларга түргэнник сиҥнэн, уонтан тахса дьиэҕэ уонна хас даҕаны социальнай хабааннаах эбийиэктэргэ кутталы үөскэтэр туруктаммыта. РФ Айылҕа ресурсаларыгар министиэристибэтигэр өрөспүүбүлүкэ сайаапканы түһэрбитин түмүгэр, сөптөөх үп көрүллэн үлэ саҕаламмыта. СӨ Экологияҕа, айылҕаны туһаныыга уонна ойуур хаһаайыстыбатын министиэристибэтэ уонна бэдэрээтчиттэр үлэни болдьоҕор түмүктүүргэ аналлаах былааны ылынан, барыта кэмигэр түмүктэниллиэҕэ», — диэн Айсен Николаев эттэ. Билиҥҥи туругунан 150 тыһ. куб м кумах кутуллубут уонна анал былаһааккаҕа 29 тыһ. куб м кумахтаах график аҕалыллыбыт. Ил Дархан таас ылыллыахтаах карьерын быһаарарга сорудахтаата.