Маны аах Тырааныспар Уопсастыба Экэниэмикэ

Үөһээ Бүлүүгэ Бүлүү өрүһү туоратар күргэ тутуллар буолла

Саҥа сыл саҕаланыыта өссө биир үөрүүлээх сонуну бэлэхтээтэ. Ол курдук, РФ Главгосэкспертизата Үөһээ Бүлүү сэлиэнньэтин аннынан Бүлүү өрүһү туоратар сүүнэ күргэ  бырайыагын көрөн-истэн баран, тутууну ыытарга толору мэктиэлээтэ.

Санатар буоллахха,   күргэ уһуна 1657 м, оттон биэрэк икки өттүгэр килэмиэтирдии тахса уһуннаах суолга  хапытаалынай өрөмүөн ыытыллыаҕа. Ону тэҥэ, тутуу учаастагар киирcэр Мээнэкэн үрэҕи туоратар дьоҕус муоста, ууну аһардар ситимнэр тутуллуохтара. Бырайыагы «Хотьковскай автомост» ХЭУо оҥордо,   сакаасчытынан «Бүлүү» федеральнай суол управлениета буолар.

Владимир Поскачин, Үөһээ Бүлүү улууһун баһылыга:

—Бүлүү федеральнай суолун управлениетын салалтатын чахчы дьаныардаах туруулаһыытынан  Үөһээ Бүлүү сэлиэнньэтин аннынан Бүлүү өрүһү туоратар сүүнэ күргэ бырайыага оҥоһуллан бүттэ, федеральнай былаас толору мэктиэлээтэ.  Бу сылга  тутуу генеральнай бэдэрээтчитэ быһаарыллыахтаах, ол аата  быйыл күргэни тутуу саҕаланар. Бу — Бүлүү федеральнай суолугар бэһис күргэ буолар. Бастакы – Чыбыыда, иккис  — Танара,  үһүс – Марха уонна төрдүс — Түүкээн үрэхтэргэ тутуллан, айан дьонун чахчы абыраата.

Ити этиллибит үтүмэн үлэ Бүлүү федеральнай суолун управлениетын салайааччыта  Николай Иванович Андреев быһаччы салалтатынан, туруулаһыытынан ыытыллар, олоххо киирэр. Николай Иванович бары өттүнэн күүстээх, кыахтаах салайааччы,  урукку өттүгэр түһээн да баттаппатах сүүнэ тутуулары олоххо киллэрэри ситиспитэ элбэҕи туоһулуур. Бүлүү бөлөх уонна Горнай улуустарын олохтоохторо аспаал суолунан айанныырбытыттан олус диэн үөрэбит, бэрт аҕыйах чааһынан, сымнаҕастык, холкутук айаннаан,  Дьокуускай куоракка тиийэр буоллубут.

Үөһээ Бүлүү ытык-мааны олохтоохторун ааттарыттан Николай Ивановиһы ис сүрэхпиттэн эҕэрдэлиибин. Бүлүү федеральнай суолун управлениетын  кэлэктиибигэр бары үчүгэйи, дьолу-соргуну, доруобуйаны баҕарабын!

 

edersaas.ru

0
0