Бүгүн Өрөспүүбүлүкэ күнүгэр 11:00 чаастан Үөһээ Бүлүү сэлиэнньэтигэр «Эр хоһуун» түмсүү көҕүлээһининэн, улуус эр дьоно мустан, сааскы булт сезона аһыллыан иннинэ «Үс хоһуун » спортивнай комплекска арчыланнылар. Норуот биллиилээх эмчитэ, алгысчыта, ытык кырдьаҕас Кирилл Никонович Никифоров бэйэтинэн кэлэн, аал уоту аһатта, кэлбит эр дьону арчылаан алгыс тылы эттэ.
Тэрээһиҥҥэ эр дьону Үөһээ Бүлүү улууһун баһылыгын 1-кы солбуйааччы Семен Михалев: «Бу тэрээһиҥҥэ мустубут эр дьону улууспут баһылыга Владимир Поскачин аатыттан Өрөспүүбүлүкэ күнүнэн эҕэрдэлиибин! Сааскы булт сезона аһыллыан иннинэ маннык хабааннаах ураты тэрээһин Өрөспүүбүлүкэ күнүгэр ыытыллыбыта олус үчүгэй, символическай суолталаах. Бултуу барыах иннинэ бары ыраастанныбыт, арчыланныбыт. Улуус эр дьоно түмсүүлээх буолуоҕуҥ, кэргэннэрбитигэр, оҕолорбутугар, аҕам саастаах дьоннорбутугар дурда-хахха буолуоҕуҥ! Барыгытын Өрөспүүбүлүкэбит күнүнэн!«, — диэн эҕэрдэлээтэ
Түмсүүнү көҕүлээччилэртэн биирдэстэрэ улуустааҕы спорка управлениетын начаалынньыга Николай Николаев: «Улуус эр дьонун түмсүүтэ быйыл олунньуга тэриллибитин кэнниттэн бастакы тэрээһиммит ыытыллыбытынан ис сүрэхпиттэн эҕэрдэлиибин. Бу тэрээһиҥҥэ лотереяны ыытыыга улуус тэрилтэлэрин салайааччылара көмөлөстүлэр, кинилэргэ махталбын тиэрдэбин. Бары маннык түмсүүлээх буоллахпытына, барытын кыайыахпыт, ситиһиэхпит. Эдэр дьоҥҥо, оҕолорбутугар бары өттүнэн холобур буолуохтаахпыт. Аҕыс ыйдаах кыһын кэнниттэн саха киһитэ сааскы булка тахсыыны туоххаһыйа күүтэр. Бары этэҥҥэ бултааҥ, ууга-уокка сэрэнэн сылдьаргытыгар баҕарабын. Барыта этэҥҥэ буоллун!», — диэн эр дьоҥҥо туһаайан эттэ.
Оһуохайы эдэр кэскиллээх этээччи Андрей Алексеев олус табыллан эттэ. Оһуохайга ортоку эргииргэ эдэр уолаттар, оҕолор киирдилэр. Эр дьон, аҕалар кинилэри төгүрүктүү, хаххалыырдыы турунан оһуохайдаатылар.
Үгүс аҕалар уол оҕолорун илдьэ кэлбиттэрэ олус махталлаах дьыала. Арчылана кэлбиттэр саалаҕа киирэллэригэр босхо билиэти ылбыттарынан лотерея оонньонон, илиилэригэр бааттаахтар «Баай тайҕа» маҕаһыынтан араас сэртипикээттэри уонна кус көҥүлүн сүүйэн, этэргэ дылы өттүк харалаах, илии тутуурдаах үөрэн-көтөн тарҕастылар.
Николай Эппяхов, Сургуулуктан төрүттээх:
— Маннык тэрээһин ыытыллыбыта олус үчүгэй. Киһи сүргэтин көтөҕөр. Уолбун Айааны илдьэ кэллим. Төһө кыалларынан уолбун булка-алка такайа сатыыбын. Барыгытын Өрөспүүбүлүкэ күнүнэн эҕэрдэлиибин!
