Үөһээ Бүлүү Боотулуутун олохтоохторо Улуу Кыайыы сылыгар аахсыйа тэрийэллэр
Быйыл Ийэ дойдуга бэриниилээх буолуу сылынан сибээстээн, өрөспүүбүлүкэҕэ араас тэрээһин ыытыллан эрэр.
edersaas.ru
Биир оннук суолталаах тэрээһини Үөһээ Бүлүү улууһун Боотулуу нэһилиэгин олохтоохторо саҕалаатылар. Кинилэр социальнай ситимнэринэн маннык ыҥырыы таһаардылар:
— Саха Сирин дьоно- сэргэтэ! Улуу Кыайыы 75 сылын көрсө Үөһээ Бүлүү улууһун Боотулуу нэһилиэгин олохтоохторо Бүөтүр Одорууһап тылларыгар, Ньукулай Бойлоохоп матыыбыгар «Тыыннаахтар умнубат сыллара» диэн ырыаларынан саҕалаабыт флеш-моб аахсыйабытын салгыы ыллаан, социальнай ситимнэринэн тарҕатаргытыгар Саха сирин бары олохтоохторун ыҥырабыт!
Бу аахсыйа бүтэһик түһүмэҕинэн Улуу Кыайыы күнүгэр — ыам ыйын 9 күнүгэр нэһилиэктэргэ, улуустар кииннэригэр, куораттарга бу ырыаны улахан хордарынан ыллаан ньиргитии буолуо этэ!
Сыллар ааһыахтара. Оттон бу Улуу Кыайыыны ситиспит, дойдуларын көмүскээбит, ол модун судаарыстыбаҕа олорбут төрүт омуктар тустарынан, олор истэригэр саха хоһууннарын, бэйэлэрин өбүгэлэрин туһунан кэлэр кэнчээри ыччаппыт мэлдьи киэн тутта ахтыаҕа! Ол өрөгөйдөөх күннэргэ харах уулаах нууччалыы «День Победы» ырыаны сэргэ, саха омук баарын тухары өлбөт- сүппэт ыйаахтаах, сахалыы «Тыыннаахтар умнубат сыллара» ырыаны доргуччу ыллыахтара! Оннук буолуоҕа! Ол чахчы! Үөһээ Бүлүү улууһун Боотулуу нэһилиэгин олохтоохторо. 2020 сыл, тохсунньу 23 күнэ«.
Дьэ, онон Саха сирин олохтоохторо, боотулуулар ыҥырыыларын өйөөн, Улуу Кыайыы 75 сыллаах үбүлүөйүн «Тыыннаахтар умнубат сыллара» ырыанан көрсүөҕүҥ!
Елена ПОТОЦКАЯ, «Саха сирэ» хаһыат, edersaas.ru
Хаартыска, видео — социальнай ситимнэртэн.