Бэҕэһээ Үөһээ Бүлүү улууһун Балаҕаннааҕар 2017 сылы Аҕа сылынан биллэрэр туһунан баһылык дьаһала таҕыста. Бу сылга аналлаах тэрээһиннэри ыытарга хамыыһыйа тэриллэн, былааны оҥорон, бу күннэргэ баһылык бигэргэтиитигэр киллэриэхтэрэ.
Александр ТАРАСОВ, «Саха сирэ» хаһыат, https://edersaas.ru
Степан Дмитриев, Балаҕаннаах баһылыга:
— Дьиэ кэргэн олоҕо бигэ тирэхтээх, баай байылыат олохтоох буоларын туһугар уонна кэлэр көлүөнэ ыччаппыт инникитин түстүүр сыалтан 2017 сылы нэһилиэкпитигэр Аҕа сылынан биллэрдибит. Нэһилиэнньэ күүскэ өйүүр.
Былырыын нэһилиэкпитигэр эр дьон түмсүүтүн тэрийбиппит. Түмсүү эр дьоно субуотунньуктаан, ойууртан мас кэрдэн киллэрэн, пилорамаҕа эрбэттэрбиттэрэ. Олбуор туттааччылар туһаммыттара. Итини тэҥэ, Балаҕаннаахха киириигэ анал тутууну оҥорбуттара. Төһө кыалларынан, аҕалар статустарын үрдэтиэхпитин наада. Кистэл буолбатах, үгүс нэһилиэккэ дьахталлар дьаһайаллар. Тоҕо оннугуй, оскуолаҕа учууталлар үксүлэрэ дьахталлар. Дьаһалтаҕа эмиэ оннук. Эр дьон үксүлэрэ үөрэҕэ суохтар, оробуочайдар. Дьиҥэр, уол оҕону иитиигэ сүрүн оруолу аҕа ыларын умнуо суохтаахпыт. Дьиҥэр, өрөспүүбүлүкэ үрдүнэн аҕа оруолун үрдэтиигэ үлэни ыыта сатаабыппыт ыраатта эрээри, улаханнык кыалла илик. Үөһээ Бүлүү улууһун үрдүнэн аҕа түмсүүтүн тэрийиэххэ диэн былырыын этии киллэрбитим.
Былаан быһыытынан нэһилиэкпитигэр сыл устата Аҕа сылыгар аналлаах тэрээһиннэри ыытыахпыт.
Ыспыраапка
Балаҕаннаах улуус кииниттэн 25 км ыраах сытар. Нэһилиэнньэтин ахсаана 300-чэкэ.
