Үөһээ Дьааҥыга турбут улахан баһаарга ким буруйдааҕын ирдэһиэхтэрэ
Бэҕэһээ, бэс ыйын 12 күнүгэр, Үөһээ Дьааҥы улууһугар Хайыһардаах нэһилиэк аттыгар улахан баһаар туран, ыксаллаах быһыы-майгы биллэриллибитэ. СӨ Экологиятын, айылҕаны туһаныы уонна ойуур хаһаайыстыбатын министиэристибэтэ иһитиннэрэринэн, 15 тыһыынча гектардаах сиргэ 4 уот тарҕаныыта бэлиэтэммит, ону умуруорарга 120 киһи уонна 21 тиэхиньикэ таҕыста.
edersaas.ru
Уот турбут сүрүн биричиинэтэ — кураанах хагдаҥ оту уоттааһын диэн этэллэр биэдимистибэҕэ. Билигин баһаар буола турар сиригэр куйаас күн турар, соҕуруу- илинтэн тыал сөкүүндэҕэ 7-10 миэтэрэ күүстээхтик үрэр.
Ыам ыйыгар улуус баһылыга Гаврил Чириков тыа хаһаайыстыбатыгар хагдаҥ оту уоттуур көҥүллэммэтин туһунан сэрэтии ылбыта. Оччолорго 9 тыһыынча гектардаах сиргэ 162 термоточка умайа турарын туһунан ойууру үөһэттэн кэтээн көрөр сулууспа бэлиэтээбитэ. Улуус дьаһалтата ойуур баһаарын сэрэтэргэ тустаах миэрэ ылбакка, балаһыанньа кытаатта диэн этэллэр.
Уот нэһилиэнньэлээх пууҥҥа киирбэтин туһугар баһаарынайдар уонна олохтоохтор күүстэрин түмэн үлэлии сылдьаллар. «Үөһээ Дьааҥыга тахсыбыт ыксаллаах быһыыны-майгыны СӨ Бырабыыталыстыбата хонтуруолга ылла. Өскөтүн балаһыанньа мөлтөөтөҕүнэ, аэромобильнай бөлөх тахсыаҕа», — диэн этэр РФ ЫБММ Саха сиринээҕи салаатын сүрүн управлениетын начаалынньыгын солбуйааччы Евгений Рощин. Ол туһунан СИА иһитиннэрэр.
Ил Дархан Айсен Николаев бэҕэһээ суһал мунньах тэрийэн, баһаар туохтан тахсыбытын чинчийэр бөлөҕү анаабыта, ол түмүгүнэн буруйдаах дьон эппиэккэ тардыллыахтара.
«Саха сирэ», edersaas.ru