Үөһээ бүлүүлэр Ньурбаҕа интэринээккэ олорор кырдьаҕастарын кытта көрүстүлэр
Бүгүн Үөһээ Бүлүү улууһун делегацията Ньурбаҕа улуустар икки ардыларынааҕы интэринээт дьиэҕэ олорор биир дойдулаахтарын кытта көрүстэ.
edersaas.ru
Маннык анал көрсүһүү бэһис сылын ыытыллар. Көрсүһүүгэ делегация салайааччыта Үөһээ Бүлүү улууһун баһылыгын социальнай боппуруостарга солбуйааччы Люция Тойтонова ааспыт сылга улуус үрдүнэн туох үлэ ыытыллыбытын туһунан кылгас иһитиннэрии оҥордо, ааспыт бырааһынньыктарынан итии-истиҥ эҕэрдэтин тиэртэ. Салгыы Үөһээ Бүлүү улууһун социальнай харалтаҕа управлениетын начаалынньыга Лидия Ильина, улуустааҕы бэтэрээннэр сэбиэттэрин бэрэссэдээтэлэ Иван Чычахов биир дойдулаахтарын итии-истиҥ тылынан эҕэрдэлээтилэр.
Салгыы Ньурбатааҕы интэринээт дьиэҕэ Үөһээ Бүлүү улууһуттан олорор 19 киһиэхэ улуус дьаһалтатын бэлэхтэрин уонна нэһилиэктэр дьаһалталара анаан-минээн ыыппыт баһыылкаларын, бэлэхтэрин үөрүүлээх быһыыга-майгыга туттардылар. Барахсаттар кэтэспиттэрэ диэн сүрдээх. Үөрүүлэрэ-көтүүлэрэ муҥура суох.
Анал делегация састаабыгар баар улуус култуураҕа департаменын иһинэн тэриллибит «Сиккиэр» дьахталлар бөлөхтөрө ырыаларынан, үҥкүүлэринэн уонна улууска биллэр-көстөр ырыаһыттар кэнсиэртээн интэринээт дьиэ кырдьаҕастарын сэргэхситтилэр.
Интэринээт дьиэ кырдьаҕастарын сэбиэтин бэрэссэдээтэлэ Валентина Христофорова: «Бары биир дьиэ кэргэн курдук суулаһан этэҥҥэ олоробут. Биллэн турар, дойдубутун олус ахтабыт, саныыбыт. Улууспут сонунун истэ-билэ, көрө сылдьабыт. Интэринээт дьиэҕэ баар эдэр дьоммут кырдьаҕастарга көмөлөһөн абырыыллар.
Интэринээт үлэһиттэрэ биһигини үчүгэйдик көрөллөр-истэллэр. Түгэнинэн туһанан, биир этиилээхпин. Ол курдук, кырдьаҕастар күннэригэр маннык хабааннаах көрсүһүү буолара буоллар диэн баҕа санаалаахпын. Араас тэрээһиннэргэ бары көхтөөхтүк кыттабыт. Кэлэн барбыккытыгар барыбыт ааппытыттан махталбын тиэрдэбин», — диэн эттэ.
Интэринээт дьиэ дириэктэрин солбуйааччы Маргарита Николаева: «Кэлэн дьоҥҥутун көрсөн бараргыт олус махталлаах дьыала. Олус диэн күүтэллэр. Саҥа дьыл кэнниттэн хаһан кэлэллэрэ буолла диэн кэтэспитинэн бараллар. Кэлэн бардаххытына сирэйдиин-харахтыын сырдыыллар, сүргэлэрэ көтөҕүллэр.
Кэлбиккитин туһанан биир этиилээхпит. Санатар буоллахха, биһиэхэ 16 улуустан кырдьаҕастар, кыамматтар кэлэн олороллор. Бу улуустар дьаһалталарын кытта бииргэ үлэлиири күүһүрдүөхпүтүн баҕарабыт. Ол чэрчитинэн, сайылыкпытыгар улуустар дьаһалталара үс-түөрт саха балаҕанын тутан биэрэллэрэ буоллар. Оччоҕуна кыанар өттүлэрбит онно тахсан сайылаан, оҕуруот олордон көрүө-истиэ, оттуо этилэр. Онон бу этиибитин улуус дьаһалталара өйүөхтэрэ диэн эрэнэбит. Ньурба улууһун дьаһалтатын кытта бу боппуруоска анаан «төгүрүк остуол» тэрийэри былаанныыбыт», — диэн олус сөптөөх этиини эппитин биир бэҋэм сэргии иһиттим.
Александр ТАРАСОВ, edersaas.ru сайтка анаан