Балаҕан ыйын 4-9 күннэригэр Бразилия Гайана куоратыгар тустуу үс хайысхатыгар устудьуоннар ортолоругар аан дойду чөмпүйэнээтэ буолар.
Бу түһүлгэҕэ ыам ыйыгар Раменскайга ыытыллыбыт дойду сүүмэрдиир күрэхтэһиитигэр кыайыылаах тахсыбыт Арыйаан Тютриммыт (57 киилэ) уонна Эдуард Григорьевпыт (61 киилэ) кыттыахтаахтара. Ол эрэн, Арыйаан Тютрин бу күннэргэ Дьокуускайга буолар Дмитрий Коркин кэриэһигэр норуоттар икки ардыларнааҕы турнирга кыттарын ордордо.
Быйыл, үп-харчы боппуруоһа кыаһалаан, Арассыыйа сүүмэрдэммит хамаандата Бразилиятааҕы чөмпүйэнээккэ толорута суох састаабынан кыттар буолла. Бүтэһиктээх састаапка саха тустууга оскуолатын иитиллээччилэриттэн Чурапчытааҕы физкултуура уонна спорт институтун устудьуона, Бүлүү ыччата Эдуард Григорьев соҕотоҕун киллэрилиннэ.
Эдуарды сэргэ Бразилия түһүлгэтигэр Мурад Нухкадиев (70 киилэ, Красноярскай), Тажитин Акаев (79 киилэ, Москва), Андрей Пуриков (86 киилэ, Калининград), Абдусамад Амаев (92 киилэ, Москва) уонна Асадулла Ибрагимов (125 киилэ, Дагестан) тустуохтара.
Икки сыллааҕыта Турцияҕа ыытыллыбыт устудьуоннар ортолоругар аан дойду чөмпүйэнээтигэр көҥүл тустууга Виктор Рассадиммыт 61 киилэҕэ диэри ыйааһыҥҥа кыайыылааҕынан буолбута, оттон Виктор Степановпыт (65 киилэ) үһүс миэстэни ылбыта.
Роман Попов, edersaas.ru
Хаартыска Интэриниэттэн ылылынна.