Эдуард Григорьев Хампа, Бүлүү куорат эдэр тустууктарын кытта көрүстэ
Бүлүү куоракка Венгрия Будапешт куоратыгар Дьобуруопа чөмпүйэнээтин боруонза призера, аан дойду кылаастаах тустуук Эдуард Григорьев Баһылай Румянцев аатынан “Эрчим” спортивнай саалаҕа Бүлүү эдэр тустууктарын кытта көрсөн, тустуу араас албастарыгар маастар-кылаас көрдөрдө.
Эдуард Григорьев бу иннинэ Хампа сэлиэнньэтин спортивнай саалатыгар оҕолору, нэһилиэнньэни кытта көрсүбүтэ. Кинини кытта тириэньэрдэр Р.Г.Окоемов, Д.Р.Неустроев, Чурапчытааҕы РЦСП дириэктэрэ А.И. Андреев, спорт маастардара К.Г.Власов, Нь.Н.Барашков уонна Бүлүүттэн спортивнай кэмитиэт бэрэсэдээтэлэ Г.С.Евсеев, ДЮСШ дириэктэрэ В.В.Нифонов, тириэньэр А.Н.Харлампьев сырыттылар.
Баһылай Румянцев аатынан “Эрчим” спортивнай саалаҕа Бүлүү эдэр тустууктарын көрсөн, тустуу араас албастарыгар маастар кылаас көрдөрдө. Ол кэннэ Эдуард Григорьевка истиҥ эҕэрдэ тыллардаах суруктары кытта Бүлүү улууһун баһылыгын 1-кы солбуйааччы Иван Евсеев Бүлүү улууһун дьаһалтатын аатыттан 100000 солк. уонна тириэньэрдэргэ Роман Окоемовка, Данил Неустроевка 30000 солк. сэртипикээттэри туттартаата. Эдуард Григорьев биир дойдулаахтарын I Күүлэт нэһилиэгин дьонун-сэргэтин аатыттан истиҥ тыллардаах эҕэрдэ суругу уонна дьаһалта олохтообут 100000 солк. сэртипикээти биир дойдулааҕа, суруналыыс Андрей Яковлев —Чуос үөрүүлээх быһыыга-майгыга туттарда.
Эдуард Григорьев уонна Данил Неустроев тириэньэр үлэтин үрдүктүк сыаналааннар, махтананнар Роман Окоемовка кыһыл көмүс чаһыны бэлэхтээтилэр. Улуустааҕы спорткомитет бэрэсэдээтэлэ Гаврил Евсеев: “Эдэр тустууктар ортолоругар Эдуард Григорьев аан дойду күүстээх тустууктарын кытта иэмэх мастыы эрийсэн, кыайыы иһин сыралаһан үлэлиирэ түмүктэрдээх буолуута хас биирдии Бүлүү улууһун эдэр тустууктарын кынаттыыр, кыайыыга дьулууру үөскэтэр”, — диэтэ. Салгыы кини улуустааҕы спорт кэмитиэтин аатыттан убаһа сэртипикээтин туттарда уонна Чурапчы улууһун этиитин өйөөн, Бүлүү улууһун салалтата Эдуард Григорьев төрөөбүт Сахатын сиригэр кэлэн, Дьокуускай куоракка олохсуйан, үлэлиир усулуобуйатын тэрийэн, Дьокуускай куоракка кыбартыыра атыылаһарыгар күүстэрин холбуулларыгар сүбэлэспиттэрин иһитиннэрдэ.
Венгрия Будапешт куоратыгар Дьобуруопа чөмпүйэнээтин боруонза призера, аан дойду кылаастаах тустуук, Дьобуруопа чөмпүйэнээтин икки төгүллээх боруонза призера Эдуард Григорьев Бүлүү улууһун эдэр бөҕөстөрүгэр анаан, тустуу сыралаах үлэ буоларын, элбэх көлөһүнү тохтоххо эрэ кыайыы кэлэрин быһаарда уонна эдэр тустууктарга барыларыгар ситиһиини, кыайыыны баҕарда. Эдуард Григорьев кэлэр 2023 сылтан өрөспүүбүлүкэ улахан түһүлгэлээх күрэхтэһиилэригэр, Николай Тарскай аатынан көҥүл тустууга, Саха сирин Спортивнай оонньууларыгар төрөөбүт Бүлүүм аатыттан тустуом, ону Бүлүүм дьонугар эрэннэрэбин диэтэ. Бүлүүтүн дьоно-сэргэтэ өрүү көмөлөһөллөрүн, өйүүллэрин иһин ис сүрэҕиттэн махтанна. Маннык хабааннаах көрсүһүүлэртэн оҕолорбут сүбэ-ама ылан, үрдүккэ дьулуһаллара чуолкай суол. Онон Эдуард Григорьев Бүлүү эдэр тустууктарын кытта көрсөн, сүбэ-ама биэрбитигэр, ыалдьыттаан барбыт кини тириэньэрдэригэр, улуус спордун салалтатыгар барҕа махталбытын тиэрдэбит.
Бүлүүттэн Андрей Яковлев – Чуос.