Саха норуотугар биллэр-көстөр ааттаах-суоллаах суруналыыс, «Эдэр саас» хаһыаты төрүттээбит Уйбаан Уһунуускай хараҕын сыл иһигэр хаста да эпэрээссийэлэттэ. Улахан эрэйи да, ороскуоту да көрүстэ. Бу күннэргэ Москваҕа өссө төгүл бэрэбиэркэҕэ барыахтаах.
Оттон батсаапка Хотугу Осетияттан доҕоро, аатырбыт тустуук Эдуард Гегеев бэйэтин хараҕын биэрэр үһү диэн сурах тарҕанна. Бу сурах төһө оруннааҕын, оруна суоҕун билээри, маҥнай Уйбаан Уһунуускайга эрийэ сырыттыбыт.
—Улаханнык долгуйан олоробун. Доҕорум эрийэн, маҥнай хотой хараҕын ыытыам диэбитэ. Кэлин оннук табыллыбат үһү, онон бэйэм киэнин биэрэргэ бэлэммин диэн улаханнык соһутта, — диир.
Аны, сөҕүмэр сенсацияны оҥорорго бэлэм киһиэхэ, Владикавказка, Эдуард Гегеевкэ эрийэн тиийдибит.
—Мин Саха сирин, саха норуотун олус таптыыбын. Онно оҕо сааспыттан алтыспыт чугас доҕоттордоохпун. Кинилэри кытта сибээһи тута олоробун. Кинилэртэн Уйбаан Уһунуускай кыһалҕатын истибитим. Уйбаан — чугас доҕорум. Мин доҕотторум тустарыгар ис сүрэхпиттэн ыалдьабын.
Бастаан хотойу тыыннаахтыы туттаран, ол хараҕын туһаныахха диэн этиилээҕим. Оннук табыллыбат эбит. Онон толкуйдаан бараммын, доҕорум туһугар бэйэм донор буоларга бэлэммин биллэрбитим.
—Куттаммаккын дуо? Кэлин кэмсиниэҥ суоҕа дуо?, — диэн хат-хат ыйыттым.
—Сөп түбэһэр буоллаҕына, биэрэбин, — диир спортсмен отой холкутук.
—Оттон кэргэниҥ, оҕолоруҥ туох дииллэрий? Сөбүлэһэллэр дуо?
— Мин дьиэ кэргэним миигин истэр. Барыларын ыҥыртаан, түмэн олорон, туох санаалаахпын эппитим.
* * *
Харахха трансплантация (полная замена глаз) оҥоһуллубута билиҥҥитэ суох, хаама сылдьар тыыннаах дьон донор буолбута эмиэ биллибэт. Арай, ымпыгар-чымпыгар тиийэ бэрэбиэркэ кэннэ, барыта сөп түбэһэрэ билиннэҕинэ эрэ, сибилигин эрэ өлбүт киһиттэн хараҕын сорох наадалаах чаастарын ылан эпэрээссийэни оҥороллорун туһунан суруллар. Оттон бу чэгиэн, чиргэл, сүүрэ сылдьар киһи донор буоларга бигэтик санаммыта сөҕүмэр! Дьиҥнээх үтүө доҕоттордоох киһи өлөн-охтон биэрбэт! Оннук да буоллун.
Кылгастык:
Эдуард Гегеев аҕата Аҕа дойду сэриитигэр өлбүт. Ийэтэ пединституту бүтэрэн, Аллайыахаҕа Чокурдаахха кэлэн учууталлаабыт.
Эдуард 1959 сыллаахтан көҥүл тустуунан дьарыктаммыт. Ити сыл өрөспүүбүлүкэҕэ оҕолорго чөмпүйүөннээбит. Эһиилигэр өрөспүүбүлүкэҕэ улахан дьон ортотугар кыайыыны ситиспит.
Дьокуускайга тутуу техникумугар үөрэммит. Салгыы СГУ ИТФ-гар, Хабаровскайга үөрэммит.
Тустуунан утумнаахтык дьарыктаммыт спортсмен ССРС спорт маастара, РСФСР чөмпүйүөнэ.
Эдуард Гегеев кэргэннээх, түөрт оҕолоох. Кэргэнэ Лариса Сергеевна Хотугу Осетия үтүөлээх бырааһа. Кыра кыыһа уонна кыра күтүөтэ медицина наукатын хандьыдааттара.
Биһиги корр.,«Саха сирэ» хаһыат, edersaas.ru
Хаартыска: Ушницкайдар архыыптарыттан.