Быйыл сыстыганнаах дьаҥ өрө туран, оскуолаларга «Тиһэх чуораан» бырааһынньыга уратытык ыытыллар.
edersaas.ru
Уус Маайа Эдьээн орто оскуолатын аҕыс оҕо бүтэрээри сылдьар. Бу хаартыскаҕа выпускниктар быйыл күһүн балаҕан ыйын 1 күнүгэр түспүттэрэ. Хомойуох иһин, коронавирус пандемията туран, оҕолор быйыл ыам ыйын 25 күнүгэр оскуолаларыгар тиһэх чуорааннарын тыаһын истибэтилэр.
Оскуола бастыҥ үөрэнээччитэ, киэн туттуута Сандаара Атласова кыһыл көмүс мэтээлинэн оскуолатын түмүктээри сылдьар. Сандаара кыра эрдэҕиттэн үөрэххэ тардыһыылаах буолан, наар туйгуннук үөрэммитэ. Уруһуйга талааннаах, учуутал эһэтин Гаврил Атласовы утумнааччы. Быйыл Ил Дархан Харыйатыгар сылдьар чиэскэ тиксибитэ. Сандаара БКЭ-ҕэ урукку сылларга ким да талбат предметтэрин — информатиканы уонна английскай тылы талла.
Иккис туйгун үөрэнээччи — Алина Атласова. Кини — айылҕаттан бэриллибит талааннаах кыыс. Ордук култуура өттүгэр ситиһиилээх. Көхтөөх актыбыыһа суох улуустааҕы, оскуолатааҕы тэрээһиннэр ыытыллыбаттарын тэҥэ.
Быйыл оскуоланы үс уол бүтэрэр. Стас Атласов — оскуола биир киэн туттар үөрэнээччитэ. Кини саахыматынан дьарыктанар буолан, оскуолатын чиэһин өрүү көмүскээччи. Математикаҕа ХИФУ иһинэн ыытыллар олимпиадаҕа кыттан, сэмэй ситиһиилэрдээх. 2016 сылтан өрөспүүбүлүкэтээҕи «Көтүөххэ үрдүккэ хотойдуу» уолаттар ааҕыылаарын куонкурустарын кыттыылааҕа. Быйыл саас Улуу Кыайыы 75 сылыгар аналлаах өрөспүүбүлүкэтээҕи кэтэхтэн көрүү-куонкуруска Стас Атласов, Алина Атласова 1-кы истиэпэннээх дипломант буолан үөртүлэр.
Бастыҥ спортсмен Ян Винокуров 2017 сылтан өрөспүүбүлүкэтээҕи «Көтүөххэ үрдүккэ хотойдуу» уолаттар ааҕыыларын куонкурустарын кыттыылааҕа, «Истиҥ ааҕааччы» анал аат хаһаайына.
Оттон Дьулуур Егоров быйыл К.Н. Туприн аатынан өрөспүүбүлүкэҕэ бастыыр иһин күрэхтэһии призера, сүүрүүгэ 3-с, наартаны ойууга 2-с миэстэлэрдээх. 2019 сыллаахха Хотугу норуоттар многоборьеларыгар Нерюнгри куоракка ыыттыллыбыт «Южная Якутия» аһаҕас өрөспүүбүлүкэтээҕи турнирга сүгэ быраҕыытыгар 3-с бириистээх миэстэҕэ тиксибитэ. Бу үөрэнээччилэр ситиһиилэринэн оскуолаларын, улуустарын аатын элбэхтик ааттаппыттара.
Эдэр кэскиллээх учуутал, «Саха сирин киэн туттуута» бэлиэ хаһаайката Снежана Винокурова бу оҕолорго бэһис кылаастан оскуоланы бүтэриэхтэригэр диэри кылаас салайааччытынан үлэлээн кэллэ.
Оскуолаҕа ыытыллар тэрээһиннэргэ саамай көхтөөх, саҥалыы көрүүлэрдээх, өрүү кыайыыга дьулуһар үөрэнээччилэр биһигини мэлдьи сөхтөрөллөр. Света Атласова, Рая Миронова, Ангелина Мельник оскуолабыт кэрэ куоластаах ырыаһыттарынан буолаллар.
Алина Атласова, Сандаара Атласова, Стас Атласов, Ян Винокуров салгыы БКЭ-ни туттараары бэлэмнэнэ сылдьаллар.
Быйылгы сыл бастыҥ үөрэнээччилэригэр ситиһиилээхтик туттаран, баҕалаах үөрэхтэригэр киирэллэригэр баҕарабыт.
«Саха сирэ» хаһыакка, edersaas.ru саайтка анаан
Ирина ВИНОКУРОВА,
Уус Маайа улууһа, Эдьээн нэһилиэгэ.