Эдьигээн улууһа: өссө биир эбэҥки национальнай статустаах нэһилиэк баар буолуо.

Бу нэдиэлэ саҥатыгар СӨ бырабыыталыстыбатын мунньаҕар Эдьигээн улууһун Лииндэ нэһилиэгэр национальнай эбэҥки статуһун биэрэр туһунан боппуруос көрүлүннэ.

Быйыл муус устар 10 күнүгэр Лииндэ нэһилиэгин олохтоохторо национальнай статуһу ыларга сөбүлэҥнэрин биэрбиттэрэ.

Эдьигээн улууһун баһылыга Алексей Мандаров:
—Бырабыыталыстыба анал хамыыһыйатыгар ити боппуруос көрүлүннэ. Лииндэ нэһилиэгин олохтоохторуттан 80 %-на эбэҥкилэр. Онон ити статуһу ылар толору бырааптаахтар. Билиҥҥи туругунан, Лииндэ 265 нэһилиэнньэлээх. Үксүн балыктааһынынан, булдунан-алдынан дьарыктаналлар. 700-тэн тахса табалаахтар. Улуус кииниттэн 100 км ыраах сытар.
Билигин улууска Кыстатыам уонна Эдьигээн сэлиэнньэтэ итинник статустаахтар. Онон үһүс баар буолар кыахтаах. Ил Түмэн кэлэр сиэссийэтигэр дьокутааттар ити боппуруоһу көрүөхтэрэ. Ылыналлар ини диэн эрэнэбит.

Александр ТАРАСОВ, «Саха сирэ» хаһыат, edersaas.ru