Эдьигээн олохтоохторо, элбэх оҕолоох Сивцевтэр дьиэҕэ олорор кэмнэрин олус туһалаахтык атаараллар.
edersaas.ru
Бу туһунан улуустааҕы култуура уонна туризм отделын салайааччыта Ирина Бурцева бу курдук кэпсиир:
— Ыал аҕа баһылыга Василий Сивцев — профлиссиэй үлэһитэ. Ийэлэрэ Александра Васильевна култуура отделын исписэлииһэ. Түөрт оҕолоох иллээх дьиэ кэргэн «Нэһилиэк сайдыыта» өрөспүүбүлүкэтээҕи бырагырааманан кэтэх дьиэ туттан олороллор.
Улахан кыыс Света Дьокуускайдааҕы педкэллиэс муусука салаатын 2 -с кууруһугар үөрэнэр.
Улахан уол Володя 7-с кылааска, кыра уол Вася 4-с кылааска үөрэнэллэр. Кыра кыыс Настя уһуйаан иитиллээччитэ.
Билигин оҕолор бары коронавирус дьаҥыттан харыстанан, дьиэҕэ тэйичиттэн олорон үөрэнэллэр. Сивцевтэр дьиэҕэ олорор иллэҥ кэмнэрин олус интэриэһинэйдик атаараллар. Дьиэ-уот ис-тас үлэтэ, сибэкки олордуута, оҕуруот аһын сиэмэтин бэлэмнээһинэ, сарай хомуйуута — барытыгар сиэттиспинэн сылдьаллар.
Аҕалара саамай сөбүлүүр минньигэс аһа торт буолан, оҕолор бэйэлэрэ оҥорон таптыыр киһилэрин күндүлүүллэр.
Оттон кыра Настя күннээҕи үлэтэ — пластилинынан тугу интэриэһиргээбитин оҥорон таһаарыы. Соторутааҕыта, бэл, Эдьигээн гиэрбэтин оҥорон дьонун соһуппут да, үөрдүбүт даҕаны.
Света бырааттарын уонна балтын ырыаҕа үөрэтэр эбит. Бэйэтэ фортепианоҕа оонньуур. Онон сотору-сотору бу дьиэҕэ оҕо ырыата-тойуга иһиллэр.
Ити курдук, Сивцевтэр дьиэ кэргэн коронавирус сыстыганнаах дьаҥыттан харыстанан, дьиэлэриттэн ханна да тэйбэккэ, иллээх дьиэ кэргэн быһыытынан бэркэ дьаһанан олороллор.
Елена ПОТОЦКАЯ, «Саха сирэ» хаһыат, edersaas.ru